DXX: Toshkent viloyatida prokuratura xodimlari 25 ming dollar bilan ushlandi

Maʼlum boʻlishicha, Bosh prokuratura huzuridagi Iqtisodiy jinoyatlarga qarshi kurashish departamentining Guliston tuman boʻlimi boshligʻi va Bekobod shahar boʻlimi katta tezkor vakili fuqarodan 25 ming dollar pora olayotganda ashyoviy dalillar bilan ushlangan.

Tergov maʼlumotlariga koʻra, ular Zangiota tumanidagi 4 ta MChJga oid jinoyat ishini ular foydasiga hal etish hamda Sirdaryo viloyati Soliq boshqarmasi tomonidan oʻtkazilgan tekshiruvlarni “noʻqonuniy” deb topishni vaʼda qilishgan.

Shuningdek, jinoyat ishi doirasida ular MChJ rahbaridan avvalroq 108 ming dollar olgani ham aniqlangan.

Hozirda gumonlanuvchilarga nisbatan Jinoyat kodeksining 168-moddasi 4-qismi “a” bandi va 28, 211-moddasi 3-qismi “a” bandi bilan jinoyat ishi qoʻzgʻatilib, ularga nisbatan qamoq ehtiyot chorasi qoʻllanilgan. Tergov harakatlari davom etmoqda.