Hokimning til masalalari boʻyicha maslahatchisi lavozimi joriy etiladi

 Hujjatga koʻra, 2026 yil 1 yanvardan boshlab respublika darajasidagi davlat organlari, xoʻjalik birlashmalari hamda mahalliy hokimliklarda rahbarning maʼnaviyat va davlat tili masalalari boʻyicha maslahatchisi lavozimi joriy etiladi.

Qarorning asosiy yoʻnalishlari quyidagicha:

Asosiy maqsadlar

Davlat tilidan barcha sohalarda samarali foydalanish;

Oʻzbek tilini oʻqitish tizimini takomillashtirish;

Tilning sofligini saqlash va lugʻat boyligini oshirish;

Axborot texnologiyalari va sunʼiy intellekt orqali qoʻllab-quvvatlash;

Xorijdagi nufuzini oshirish va vatandoshlar uchun sharoit yaratish.

Amaliyotga tatbiq etish choralari

2025–2026 yillarga moʻljallangan amaliy dastur tasdiqlanadi;

Davlat idoralarida maʼnaviyat va til masalalari boʻyicha maslahatchi lavozimi joriy etiladi;

Maktabgacha va maktab taʼlimida yangi darsliklar, lugʻatlar va multimedia materiallar yaratiladi;

“Oʻzbekiston milliy qomusi” va “Ona tili. Qomus” kitoblari chop etiladi.

Axborot texnologiyalari va sunʼiy intellekt

Oʻzbek tilini sunʼiy intellekt asosida qoʻllab-quvvatlovchi platforma ishlab chiqiladi;

Yangi atamalar va lugʻatlarni qamrab olgan elektron reyestr va platforma tashkil etiladi.

Ilmiy-amaliy va madaniy tadbirlar

Har yili oktabrda xalqaro konferensiyalar, olimpiadalar va tanlovlar oʻtkaziladi;

“Jonajon oʻzbek tilim”, “Oʻzbek tili – qalbim tarjimoni” kabi loyihalar amalga oshiriladi;

Alisher Navoiy nomidagi xalqaro olimpiada gʻoliblari universitetlarga davlat granti asosida qabul qilinadi.

Vatandoshlar va millatlararo hamjihatlik

Milliy madaniy markazlar va xorijdagi oʻzbek diasporalari uchun til kurslari kengaytiriladi;

“Ibrat farzandlari” loyihasi doirasida sunʼiy intellekt yordamida til oʻrgatish moduli ishga tushiriladi.

Nazorat va ijro

Adliya vazirligi qonunchilikka tegishli oʻzgartirishlarni tayyorlaydi;

Ijroni tashkil etish va nazorat qilish Bosh vazir A.N. Aripovga yuklanadi.