Masʼullarning masʼuliyatsizligi bogʻcha bolalarining boshiga bolgʻa boʻlyapti

Joriy yil 20 fevral kuni zaharlanish sababli 70 nafardan ortiq bola shahardagi ikki shifoxonaga yotqizilgan, ulardan 3 nafari reanimatsiya boʻlimida qolmoqda.

Maʼlumotlarga koʻra, ayrim bogʻchalarda ovqatlanish tizimi keytering asosida tashkil etilgan. 2024 yil 25 iyuldagi qaror bilan Quvasoy shahrida davlat bogʻchalarida keytering tizimi joriy qilingan va ovqat tayyorlash hamda yetkazib berish boʻyicha xususiy korxona taklifi maʼqullangan.

Bu holat ilk bor kuzatilayotgani yoʻq. 2025 yil sentabr oyida Toshkent viloyatining Piskent, Boʻka, Bekobod, Quyichirchiq va Oqqoʻrgʻon tumanlarida jami 1922 nafar tarbiyalanuvchi ovqatdan zaharlanish alomatlari bilan shifoxonalarga murojaat qilgan edi. 

Shu holat yuzasidan Jinoyat kodeksining 257-1-moddasi 1-qismi bilan jinoyat ishi qoʻzgʻatilgan.

Shuningdek, 2025 yil oktabr oyida Jizzax viloyati Forish tumanidagi toʻrtta davlat bogʻchasida ham 40 nafarga yaqin bola ovqatdan zaharlangani aniqlangan.

Mutaxassislar taʼkidlashicha, har safar bir xil ssenariy takrorlanmoqda: zaharlanish, komissiya tuzish, bayonotlar va nazoratni kuchaytirish haqidagi vaʼdalar. Biroq tizimli muammolar oʻz yechimini topmayapti.

Masala faqat ayrim rahbarlarni almashtirishda emas. Bogʻchalarda oziq-ovqat taʼminoti zanjirini toʻliq qayta koʻrib chiqish zarur: mahsulot yetkazib beruvchilarni tanlash, tender jarayonlarining shaffofligi, sanitariya nazorati va masʼul shaxslarning javobgarligi kuchaytirilishi kerak.

Bolalar salomatligi - eng ustuvor masala. Maktabgacha taʼlim tizimidagi ommaviy zaharlanishlar tasodif emas, balki chuqur tizimli muammolardan dalolat bermoqda. Savollar ochiq, javoblar esa amalda namoyon boʻlishi kerak.

Muallif: Maftuna Baxtiyorova