Navoiyda 34,8 mlrd so‘mlik keshbek firibgarligi fosh etildi

Navoiy shahrida 34,8 mlrd so‘mlik mablag‘lar “keshbek” sifatida hisoblanib o‘zlashtirib yuborilganligi fosh etildi.  

Bosh prokuratura huzuridagi Departamentning Navoiy shahri bo‘limi o‘tkazgan tergovga qadar tekshiruvda 13 ta MCHJning mas’ul shaxslari va boshqalarning o‘zaro til biriktirgani aniqlandi.

Ular 4,5 trln so‘mlik mahsulot yetkazib berilgani haqida soxta elektron hisob-fakturalarni rasmiylashtirgan. Shuningdek, savdodan tushgan pullarni nazorat-kassa mashinalari orqali go‘yoki kirim qilib, fuqarolarga mahsulot sotilgandek xarid cheklarini rasmiylashtirgan.

Natijada 105 524 nafar fuqaroning nomiga “Soliq Mobile” ilovasi orqali 34,8 mlrd so‘m keshbek hisoblangan.

Ushbu mablag‘lar qonunga xilof ravishda o‘zlashtirilgan.

Mazkur holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.