Oʻrmon xoʻjaligining ijaradagi yerini 61 ming dollarga sotmoqchi boʻlganlar ushlandi

Qayd etilishicha, Bosh prokuratura huzuridagi departamentning Mirobod tumani boʻlimi va DXX xodimlari hamkorligida tezkor tadbir oʻtkazilgan. Tadbir davomida P.D. va boshqalar  A.D.  hamda X.N. ismli shaxslarga Ohangaron davlat oʻrmon xoʻjaligiga tegishli yer maydoni hududidan uzoq muddatli ijara shartnomasi asosida ajratilgan 2 gektar yer maydonini 61 000 AQSh dollariga sotishga kelishgani aniqlangan. U fuqarolarga yer maydoni hujjatlarini tanishlari yordamida ularning nomiga rasmiylashtirib berishini aytib, oldindan 20 000 AQSh dollarini olgan vaqtida ashyoviy dalillar bilan ushlangan. 

Shu kabi, departament hamda DXXning Andijon viloyati boshqarmalari xodimlari hamkorligida oʻtkazilgan tezkor tadbirda fuqaro N.T. fuqaro A.P.ning yaqin qarindoshiga Asaka tumani "Yoshlar sanoat zonasi" hududidan ajratilgan 5 sotix yer maydonini olib berishi evaziga 20 000 AQSh dollarini olgan vaqtida ashyoviy dalillar bilan ushlangan. 

Departamentning Konimex tuman boʻlimi va IIB xodimlari hamkorligida oʻtkazilgan tezkor tadbirda fuqaro Sh.B. auksion savdosi orqali sotib olgan Qiziltepa tumanidagi 3 sotix yer maydonini hamda ushbu hududga tutash yana 4 sotix yer maydonini fuqaro X.P.ga 15 000 AQSh dollariga sotishga kelishgani aniqlangan. U yer maydoni hujjatlarini 4 000 AQSh dollari evaziga rasmiylashtirib berishini vaʼda qilib, jami 19 000 AQSh dollarini olgan vaqtida ashyoviy dalillar bilan qoʻlga tushgan. 

Bundan tashqari, departamentning Xorazm viloyati boshqarmasi va viloyat IIB xodimlari hamkorligida oʻtkazilgan tezkor tadbirda fuqaro N.A. fuqaro A.B.ning ishonchiga kirib, unga Yangibozor tumani "Xalqobod" massivida joylashgan hokimlik zaxirasidagi 6 sotix maydonini rasmiylashtirib olib berishi evaziga 1000 AQSh dollari va 17,5 mln soʻmni olgan vaqtida ashyoviy dalillar bilan ushlangan. 

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.