Oʻzbekistonda ekologik baholash jarayonlari yanada takomillashtirilmoqda

Tadbirda Oʻzbekiston Respublikasi Ekologiya va iqlim oʻzgarishi milliy qoʻmitasi Davlat ekologik ekspertiza markazi direktori Gʻayrat Muxamedov boshchiligidagi delegatsiya ham ishtirok etdi.

Maʼlumot uchun, Espo konvensiyasi BMT Yevropa iqtisodiy komissiyasi tomonidan ilgari surilgan xalqaro bitim boʻlib, 1991 yilda Finlyandiyaning Espo shahrida imzolangan va 1997 yilda kuchga kirgan. Konvensiyaga koʻra, atrof-muhitga taʼsirni baholash tartibi potensial xavfli loyihalar boʻyicha nafaqat ushbu loyiha amalga oshirilayotgan davlatning oʻzida, balki uning taʼsir doirasiga tushishi mumkin boʻlgan qoʻshni mamlakatlarda ham oʻtkazilishi lozim. Konvensiya talablariga binoan, baholash jarayoni rejalashtirishning eng dastlabki bosqichlaridanoq amalga oshirilishi kerak.

Tadbirda Oʻzbekiston vakillari tomonidan mamlakatda amalga oshirilayotgan ekologik islohotlar, AMTB va SEBning yangi mexanizmlarini joriy etish, ekologik jarayonlarni raqamlashtirish va jamoatchilik ishtirokini kengaytirish boʻyicha ishlar haqida maʼlumot berildi. Shuningdek, Oʻzbekiston xalqaro hamkorlikni kuchaytirishda faol ekani taʼkidlandi.

Tadbir davomida mamlakatlar oʻrtasida tajriba almashish, hududiy-tadbirkorlik va energetika, iqlim, biohilma-xillik sohalarida ekologik baholash samaradorligini oshirish, Konvensiya va Protokol talablariga rioya qilinishi ustidan monitoring mexanizmlarini takomillashtirish, Markaziy Osiyo davlatlari ishtirokida subhududiy hamkorlikni mustahkamlash, ekologik jarayonlarda raqamli yechimlar va sunʼiy intellekt texnologiyalaridan foydalanish imkoniyatlarini muhokama qilish, kelasi davr uchun ish rejalarini shakllantirish, yangi qoʻllanmalar va oʻquv dasturlarini tayyorlash masalalariga eʼtibor qaratilmoqda.

Ushbu muhim tadbirda Oʻzbekistonning ishtiroki xalqaro hamkorlikni rivojlantirish, milliy islohotlarni taqdim etish va atrof-muhitni muhofaza qilish sohasida tajriba almashish uchun muhim imkoniyat hisoblanadi.