Oʻzbekistonda kambagʻallik darajasi 4,5 foizgacha qisqaradi

Prezident Shavkat Mirziyoyev mahallalarni ishsizlik va kambagʻallikdan xoli hududlarga aylantirish, aholi bandligini oshirish boʻyicha ishlar bilan tanishdi. Yigʻilishda mavjud sustkkashliklar va ishga solinmayotgan imkoniyatlar tanqidiy baholandi.

Mahallalarda kambagʻallik va ishsizlikni kamaytirish boʻyicha, avvalo, hududlarning muammolari va “oʻsish nuqtalari” aniqlanib, tizimli chora-tadbirlar ishlab chiqilishi topshirildi. Shundan tashqari, aholi murojaatlarini mahallalarda bevosita hal qilish, ogʻir toifadagi hududlarga infratuzilma, elektr taʼminoti, internet va tomorqadan foydalanish imkoniyatlarini kengaytirish vazifalari belgilab berildi.

2025 yilda mamlakatda kambagʻallik darajasi 8,9 foizdan 6 foizga tushishi kutilmoqda. Kelgusi yili esa bu koʻrsatkich 4,5 foizgacha qisqartirilishi maqsad qilingan. Bunga erishish uchun mahallalarda barqaror bandlikni taʼminlash, daromad manbalarini yaratish, aholini kasb-hunarga oʻqitish va tadbirkorlikka jalb qilish boʻyicha kompleks choralar koʻriladi.

Shuningdek, kichik va oʻrta loyihalarni amalga oshirish, chegara va anklav hududlarda infratuzilmani yaxshilash, turistik mahallalar va mikrosanoat markazlarini tashkil etish kabi chora-tadbirlar ham koʻrib chiqildi.

Prezident mutasaddilarga mahallalardagi masalalarni manzilli hal qilish va bandlik hamda kambagʻallikni qisqartirish boʻyicha vazifalarni yuqori masʼuliyat bilan amalga oshirish topshirigʻini berdi.