Prokuror Mubashshir Ahmadga 7 yil ozodlikdan mahrum qilish jazosini soʻradi

Sudning navbatdagi majlisi, kecha, 18 sentabr kuni davom ettirildi. Sudya Bobur Rahimov raisligida oʻtgan sud majlisining muzokara bosqichida davlat ayblovchisi bitta modda boʻyicha jarima, ikkita modda boʻyicha qamoq jazosi berilishini soʻrab, Mubashshir Ahmadga uzil-kesil 7 yil ozodlikdan mahrum qilish jazosi berilishini soʻradi.

Oʻz navbatida advokatlar guruhi Alisher Tursunovga qoʻyilgan ikki modda — «Jamoat xavfsizligi va tartibiga tahdid soladigan materiallarni tarqatish» hamda «Milliy, irqiy, etnik yoki diniy adovat qoʻzgʻatish» ayblovlarini bekor qilishni soʻradi.

Shu bilan birga, materiallarni Din ishlari boʻyicha qoʻmita ruxsatisiz tarqatishga oid ayblov qisman tan olindi. Himoyachilar bu harakat ijtimoiy xavflilikdan mahrum boʻlganini qayd etib, uni JK 70-moddasi asosida bekor qilish va musodara qilingan texnika hamda ashyolarni qaytarishni soʻradi.

Advokatlar sudda qoʻyilgan 3 modda boʻyicha ayblovchilar va ekspertlar bilan kelishmovchiliklari hamda eʼtirozlarini bildirdi. Shuningdek, hukm chiqarishda Mubashshir Ahmadning salomatligi, jamiyatdagi oʻrni, yoshlar taʼlimiga qoʻshgan hissasi va oilada yagona boquvchi ekani inobatga olinishi soʻraldi. Mubashshir Ahmad himoyachilarining fikriga toʻliq qoʻshilishini bildirdi.

Eslatib oʻtamiz, Mubashshir Ahmad Jinoyat kodeksining 156-moddasi (milliy, irqiy, etnik yoki diniy adovat qoʻzgʻatish) 2-qismi, 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi «g» bandi va 244-3-moddasi (diniy mazmundagi materiallarni qonunga xilof ravishda tayyorlash, saqlash, olib kirish yoki tarqatish)da ayblanmoqda.

Navbatdagi sud majlisi 22 sentabr, soat 14.00 ga belgilandi.