Parij-2024: Bugun Oʻzbekiston hisobiga yana uchta medal qoʻshiladi

Toshkent vaqti bilan soat 11:00 dan boshlab sportning 7 turi boʻyicha 9 nafar atlet oʻyinlari start oladi. Dastlab erkaklar oʻrtasidagi yengil atletika bahslarida Shohruh Davlatov oʻzining chiqishlarni boshlab beradi. 

Soʻngra taekvondo boʻyicha Olimpiadaning 1/8 final bosqichida +80 kg vazn toifasida Nikita Rafalovich eronlik Arian Salimiyga qarshi jang qiladi. Shu sport turining chorak final ayollar bahsida +67 kg vazn toifasida Svetlana Osipova Kot-d'Ivuar vakili Astan Basiliy bilan kurashadi. 

Soat 14:30 larda ogʻir atletika sporti doirasida erkaklar oʻrtasida 102 kg vaznda Akbar Joʻrayev ishtirokini boshlaydi. Shundan soʻng ayollar oʻrtasida ham bahslarga start beriladi. Unda Oʻzbekiston delegatsiyasidan Rigina Adashboyeva 81 kg vaznda bahslarga kirishadi. 

Zamonaviy beshkurash bahslarida keyingi bosqich yoʻllanmasini qoʻlga kiritgan Alise Faxrutdinova bugun navbatdagi bosqichda ishtirokini davom ettiradi. 

Erkin kurash bellashuvlarida 74 kg vazn toifasida final yoʻllanmasini qoʻlga kiritgan Razambek Jamolov esa oltin medal uchun Daichi Takataga qarshi gilamga chiqadi. Bu bahs soat 22:35 dan boshlanadi. 

Kun bellashuvlarini yakunlab beradigan boks janglarida Oʻzbekistonning ikki nafar vakili oltin medal uchun kurashadi. 57 kg vazn toifasining final bahsida Abdumalik Halakov qirgʻizistonlik Munarbek Seyitbek ugʻluga qarshi ringga chiqadi. Bu jang 00:47 da boshlanadi. Tokio Olimpiadasi chempioni, bir necha karra jahon chempioni Bahodir Jalolov (+92 kg) esa final bahsini Ayub Gʻadfaga qarshi olib boradi. Bu jang soat 1:51 dan boshlab efirga uzatiladi. 

Maʼlumot uchun, boks musobaqalarida Oʻzbekiston vakillari 7 ta vazn toifasida ishtirok etmoqda. Ularning 5 tasi final yoʻllanmasini qoʻlga kiritgan. Hozircha bokschilar hisobida 3 ta oltin medal bor.