"Paxtakor" besh nafar tarbiyalanuvchisi uchun mashgʻulot kompensatsiyasi oladi

Joriy yilning 12 avgustida Oʻzbekiston futbol assotsiatsiyasi futbolchilarning maqomi va oʻtishi boʻyicha qoʻmitasining yigʻilishi boʻlib oʻtdi. 

Ushbu yigʻilishda "Paxtakor" klubining sobiq futbolchilari — Otabek Boymurodov (Buxoro), Shahzodbek Rahmatullayev (Qizilqum), Abubakir Ashurov (Andijon), Diyorbek Toʻlaboyev (Neftchi) va Muhriddin Fazliddinov (Xorazm) uchun mashgʻulot kompensatsiyasi daʼvolari koʻrib chiqildi. Bu xususida OʻzPFL matbuot xizmati xabar berdi.

Xabarda yozilishicha, qoʻmita qaroriga koʻra, yuqorida nomlari qayd etilgan futbolchilar bilan birinchi professional shartnomani tuzgan klublar (qavs ichida keltirilgan) "Paxtakor" klubiga umumiy hisobda 432 million soʻm miqdoridagi mablagʻni toʻlab berishi belgilandi. 

Liga "Paxtakor" klubining oʻz tarbiyalanuvchilaridan belgilangan tartibda mashgʻulot kompensatsiyasi ishlab olish boʻyicha amalga oshirgan ishlarini olqishlaydi. Shu oʻrinda, boshqa klublarni ham oʻz akademiyasida tarbiyalanayotgan futbolchilarning kerakli hujjatlarini toʻgʻri tartibda yuritish va sobiq tarbiyalanuvchilari boshqa klub bilan birinchi professional shartnomasini imzolagan taqdirda, tegishli tartibda ular uchun mashgʻulot kompensatsiyasi talab qilishga chorlaydi.