Tramp va Zelenskiy o‘rtasidagi suhbat katta janjalga aylanib ketdi

Qayd etilishicha, AQSH Prezidenti Donald Tramp va mamlakat Vitse-prezidenti Vens suhbat davomida bir necha marotaba Ukraina Prezidenti Zelenskiyga qarshi fikr bildirib, unga nisbatan hurmatsizlik ko‘rsatgan. 

Oqibatda uchrashuv davomida katta ehtimol bilan imzolanishi kerak bo‘lgan Amerika va Ukraina o‘rtasidagi nodir metallarga doir shartnoma imzolanmay qolgan. 

Katta tortishuvdan so‘ng Donald Tramp darhol o‘zining Truth Social ijtimoiy tarmog‘ida Ukraina Prezidenti Zelenskiyga qarata "u tinchlikka tayyor emas" deya post joyladi.

"Bugun bizda juda muhim suhbat bo‘ldi. Biz ko‘p narsalarni o‘rgandik. Hissiyotlar ichida nimani tushunish mumkinligini ko‘rish hayratlanarli. Va men shunga ishonamanki, Prezident Zelenskiy AQSH ishtirokidagi tinchlikka tayyor emas.

Men imtiyozlarni xohlamayman, tinchlikni xohlayman. Oval ofisida hurmat bor. U tinchlikka tayyor bo‘lganda qaytib kelishi mumkin", deya yozgan Tramp.

Zelenskiy esa suhbatdan ko‘p o‘tmay Oq uyni tark etgan va jurnalistlarga hech qanday izoh bermagan. Bir soat o‘tgach, uning X’dagi sahifasida muzokaralarning muvaffaqiyatsizligi haqida hech narsa bildirilmagan post paydo bo‘ldi. 

"Rahmat Amerika, qo‘llab-quvvatlaganingiz uchun tashakkur, ushbu tashrif uchun rahmat. Rahmat AQSH prezidenti, Kongress va Amerika xalqi. Ukrainaga uzoq muddatli adolatli tinchlik kerak, va biz aynan shu maqsadda ishlayapmiz", deya yozadi Ukraina Prezidenti.