Prezident “Toshkent-Sharqiy” aeroportni borib koʻrdi

“Toshkent-Sharqiy” aerodromi negizidagi biznes aviatsiyasi majmuasining qurilishi 2017 yilda boshlangan edi. Pandemiya va undan keyingi qiyinchiliklardan oʻtib, nihoyat ulkan inshoot qurib bitkazildi.

Aeroportning umumiy maydoni 561 gektardan iborat. 4 kilometr uzunlikdagi uchish-qoʻnish yoʻlagi va 3 ta harakatlanish yoʻli yangilanib, eng ogʻir samolyotlarni ham qabul qilish quvvatiga ega boʻldi. 20 ta "havo kemasi"ga moʻljallangan perron barpo etildi. “Boeing 787”, “A 320” kabi samolyotlar, biznes-jetlar hamda vertolyotlar uchun angarlar qurildi. Bu ularning qishda iliq, yozda salqin saqlanishi va xavfsizligini taʼminlaydi.

Aeroportda VIP va CIP terminallar bunyod etilgan. Oliy martabali mehmonlar zalida rasmiy kutib olish, muzokaralar va brifing oʻtkazish uchun barcha sharoitlar yaratilgan. Soatiga 100 nafar yoʻlovchini qabul qilish quvvatiga ega CIP terminalida doʻkon va ovqatlanish joylari boʻladi.

Muhimi, aeroport ICAO III-A toifasidagi ilgʻor radiotexnika va meteorologiya uskunalari bilan jihozlanadi. Bu noqulay ob-havo sharoitlarida ham uchish va qoʻnish imkonini beradi.

Yangi aeroport qulay joylashuvi tufayli poytaxt va Yangi Toshkent shahri uchun muhim transport xabiga aylanadi. Xalqaro tashriflar va ishbilarmonlik safarlarini amalga oshirish imkoniyatlari kengayadi, xorijiy investorlar uchun sharoitlar yaxshilanadi. Natijada iqtisodiy aloqalar va xizmat koʻrsatish sohasi yanada rivojlanib, yangi ish oʻrinlari yaratiladi.

Davlat rahbari shu yerda jamoat faollari, nuroniylar bilan suhbatlashdi.

– Koʻp yil tayyorgarlik qilib, mana shunday aeroport qurdik. Bu ham davlatchilikning yana bir zamini. Bu yerda yurtimizga keladigan mehmonlar va samolyotlarga yuqori darajada xizmat koʻrsatiladi. Natijada Toshkent xalqaro aeroportiga yuklama yengillashadi. Xudo xohlasa, u aeroport uchun ham boshqa joyda ulkan majmua qurishni rejalashtirganmiz. Umuman, hamma hududlarimizda katta-katta loyihalarni boshlaganmiz. Ilohim, tinchligimizga koʻz tegmasin, yangi inshootlar, farovonlik xalqimizga buyursin, – dedi prezident.