Putin Eron prezidenti bilan suhbatlashdi: Tehron Rossiyadan yordam kutmoqda

Vladimir Putin va Masʼud Pezeshkiyon oʻrtasida telefon orqali muloqot boʻlib oʻtdi. Bu haqda Kreml matbuot xizmati xabar berdi.

Suhbat davomida Rossiya tomoni jangovar harakatlarni zudlik bilan toʻxtatish va Yaqin Sharqdagi muammolarni kuch ishlatmasdan hal etish zarurligini taʼkidladi. 

Eron prezidenti Rossiyaga birdamlik uchun minnatdorlik bildirib, AQSh va Isroil hujumlari fonida mamlakat Rossiyaning xalqaro maydondagi salohiyati orqali qoʻllab-quvvatlashini kutayotganini aytgan.

Avvalroq Kreml matbuot kotibi Dmitriy Peskov Rossiya Erondan hech qanday harbiy yordam soʻrovi olmaganini bildirgan. Shu bilan birga, The Washington Post nashri Rossiya Eronga razvedka maʼlumotlari taqdim etayotgani haqida xabar bergan.

Suhbat davomida Pezeshkiyon Ozarbayjonga hujum qilingani haqidagi iddaolarni ham rad etdi. Uning taʼkidlashicha, Eron hech qachon qoʻshni davlatlarga qarshi hujum qilishni maqsad qilmagan va bunday xabarlar qoʻshnilar oʻrtasidagi munosabatlarga putur yetkazishga qaratilgan fitna hisoblanadi.