Qozogʻiston banki 176,4 mln AQSh dollariga Click aksiyalarini sotib oldi

Qozogʻistonning «Halyk Banki» Click’ning 49 foiz aksiyasini 176,4 mln AQSh dollariga sotib oldi. Shuningdek, oʻziga tegishli boʻlgan «Tenge Bank» AKning 49 foiz aksiyasini Click aksiyadorlariga 60,76 million dollarga sotdi.

Bu haqida London fond birjasi saytida maʼlum qilingan.

«Bitim tuzilishi ikki tomonning hozirgi huquqiy tuzilmalarini saqlab qolgan holda yaqin hamkorlikda ishlash imkoniyatini yaratadi», – deyiladi xabarda.

Eslatib oʻtamiz, Tenge Bank ham "Halyk Banki"ning shoʻʼba banki hisoblanadi.

Maʼlumot uchun, Markaziy Osiyodagi eng yirik moliyaviy guruh boʻlgan «Halyk» 37,5 milliard AQSh dollaridan ortiq aktivlarga ega hisoblanadi. 2025 yil 1 iyul holatiga koʻra, «Halyk» kompaniyasining Oʻzbekistonga kiritgan jami sarmoyalari taxminan 1,5 milliard AQSh dollarini tashkil etadi.

Click Oʻzbekistonning yetakchi toʻlov xizmatlari provayderi boʻlib, 20 million foydalanuvchidan iborat mijozlar bazasi va raqamli innovatsiyalar boʻyicha chuqur tajribaga ega fintech yetakchisi hisoblanadi.