Toshkent shahar hokimligi yoʻllarda  temir panjaralar oʻrnatish uchun 7,5 milliard soʻm ajratdi

Poytaxt hokimining qaroriga koʻra, shahardagi koʻcha va yoʻllarda harakat xavfsizligini taʼminlash, ayniqsa piyodalar bilan bogʻliq yoʻl-transport hodisalarining oldini olish maqsadida temir panjaralar oʻrnatish ishlari uchun 6 mlrd 912 mln 500 ming soʻm mablagʻ ajratilishi belgilandi.

Loyihalar va moliyalashtirish ishlari Toshkent shahar hokimligi “Yagona buyurtmachi xizmati” injiniring kompaniyasi buyurtmachiligida amalga oshiriladi. Mablagʻlar Toshkent shahri hokimligi huzuridagi Toshkent shahrini rivojlantirish jamgʻarmasi hisobidan moliyalashtiriladi.

Yoʻl harakati xavfsizligini taʼminlash bilan bogʻliq qoʻshimcha ishlarni amalga oshirish uchun tuman obodonlashtirish boshqarmalariga 588 million soʻm mablagʻ ajratilishi ham qarorda belgilangan.

Umumiy hisobda 7,5 milliard soʻmga yaqin mablagʻ yoʻnaltiriladi. Loyihalar orqali piyodalar xavfsizligini oshirish, yoʻl-transport hodisalarini kamaytirish va shaharning infratuzilmasini yaxshilash maqsad qilingan.