Rasman prezident boʻlgan Donald Tramp nimalarni vaʼda bermoqda?

Kecha, 20 yanvar kuni Donald Tramp Amerika Qoʻshma Shtatlari Prezidenti lavozimiga kirishar ekan, undan avval yarim soatlik nutqini bayon qildi. U oʻzining nutqida bir qator masalalarni tilga olib, Amerikani nimalar kutayotganini aytdi hamda qaysi sohalarda oʻzgarishlar qilishini vaʼda berdi. 

Donald Tramp nutqini janubiy chegarada favqulodda holat eʼlon qilinishini aytish bilan boshladi. Noqonuniy muhojirlar oqimini toʻxtatish va jinoiy guruhlarni mamlakatdan chiqarish bosh vazifa sifatida belgilanganini, shuningdek, kartellar (biznes va iqtisodiy sohalarda faoliyat yurituvchi guruh yoki tashkilotlarning qonun yoki qoidalarga zid ravishda oʻzaro kelishuvi)ni "xorijiy terroristik tashkilotlar" sifatida tan olinishi maʼlum qildi. 

Unga koʻra, yaqin yillar ichida Amerikada neft-gaz qazib olishni jadallashtirish hamda "Yashil yangi bitim" siyosatini bekor qilish rejalashtirilgan. Elektromobillar uchun majburiy talablar tugatiladi va Amerika qayta ishlab chiqarish sohasida yetakchi davlatga aylanadi. Yangi "Tashqi daromadlar xizmati" tashkil etilib, xorijiy tariflar orqali milliy boylik yaratiladi. 

Taʼkidlanishicha, Amerika taʼlim tizimiga vatanparvarlikni qayta olib kirish, yosh avlodga milliy gʻurur hissini uygʻotish maqsad qilib qoʻyilmoqda. Hukumatning irq va jinsga qarab ijtimoiy muhandislik siyosatini tugatish va faqat qobiliyatga asoslangan yondashuvni joriy qilish rejalashtirilgan.

"COVID-19 vaksinasidan bosh tortgani uchun ishdan boʻshatilgan harbiylar qayta xizmatga qabul qilinadi va ularga toʻliq maosh qayta toʻlanadi. Amerika tarixidagi eng kuchli armiya yaratilishi maqsad qilib qoʻyildi. Harbiy xizmatchilarni siyosiy tajribalardan himoya qilish choralari koʻriladi", deydi Prezident Tramp

Uning nutqida Amerika tashqi siyosatda mustaqil va yetakchi davlat boʻlib qolishi qayta-qayta yangradi. Shuningdek, Panama kanali Amerikaga qaytarilishi va bu yerda adolatsiz munosabatlarga barham berish rejasi ochiqlandi. 

Bundan tashqari, Tramp Amerika xalqini yangi birlikka chaqirib, millat birdamligini tiklashni vaʼda qildi. Barcha fuqarolar uchun tenglik, farovonlik va tinchlik taʼminlanishini asosiy vazifalardan biri sifatida koʻrsatdi. 

Umuman olib qaraganda, Trampning nutqi Amerika mustaqilligi, kuchli iqtisodiyot va milliy gʻururni tiklashga qaratilgan strategiyani ifodalaydi. U millatning har bir fuqarosi uchun umid, farovonlik va tinchlik yaratishga vaʼda berdi. Amerika endi "oltin davr"ga qadam qoʻyishi taʼkidlandi.