Rossiya generalini oʻldirishda ayblangan oʻzbekistonlik erkak umrbod qamaldi

Bu haqda Interfaks xabar berdi.

Sud qaroriga koʻra, Ahmadjon Qurbonov jazoning dastlabki 10 yilini qamoqda, qolgan qismini esa qattiq tartibli koloniyada oʻtaydi. Shuningdek, unga 1 million rubl miqdorida jarima solindi.

Terguv maʼlumotlariga koʻra, Qurbonov terroristik hujumni amalga oshirgan deb topilgan. Sud mazkur ish boʻyicha yana uch nafar ayblanuvchiga ham hukm chiqardi. Xususan, Batuxan Tochiyev 22 yilga, Ramazan Padiyev 18 yilga, Robert Safaryan esa 25 yilga ozodlikdan mahrum etildi.

Qurbonov sud jarayonida oʻz aybini toʻliq tan olgan va qilmishlaridan pushaymon ekanini bildirgan. Safaryan aybini qisman tan olgan, Padiyev va Tochiyev esa ayblovlarni rad etgan.

Maʼlumot uchun, Igor Kirillov va uning yordamchisi Ilya Polikarpov 2024 yil 17 dekabr kuni ertalab Moskva shahrining Ryazan prospektida joylashgan, general istiqomat qilgan uy yaqinida toʻxtab turgan elektr samokatga oʻrnatilgan portlovchi qurilma portlashi oqibatida halok boʻlgan. Qurbonov portlashdan bir necha soat oʻtib qoʻlga olingan.

Unga nisbatan terrorizm, noqonuniy qurol saqlash va tayyorlash bilan bogʻliq jinoyatlar boʻyicha (Jinoyat kodeksining 205-moddasi 3-qismi «b» bandi, 222.1-moddasi 4-qismi va 223.1-moddasi 3-qismi) ayblovlar qoʻyilib, sudga qadar hibsga olingan.

Rossiya huquqni muhofaza qilish organlari maʼlumotlariga koʻra, soʻroq paytida Qurbonov Ukraina razvedka xizmatlari tomonidan yollanganini hamda jinoyatni sodir etgani uchun unga 100 ming AQSh dollari va Yevropa davlatlaridan biriga sayohat qilish vaʼda qilinganini aytgan.

Terguvchilarning taʼkidlashicha, Batuxan Tochiyev va Ramazan Padiyev Qurbonov uchun Moskva viloyatidagi xosteldan xona ijaraga olgan. Ayblovga koʻra, Qurbonov hujumdan keyin shu yerda yashirinishi rejalashtirilgan boʻlgan.