Shavkat Mirziyoyev vatandoshlar va "El-yurt umidi" jamgʻarmasi stipendiatlari bilan uchrashdi

Norasmiy muhitda oʻtgan samimiy suhbat davomida Yangi Oʻzbekistondagi islohotlarni amalga oshirish bilan bogʻliq masalalar, xususan, ularni faol ilgari surishda vatandoshlar va ularni birlashtiruvchi tashkilotlarning ishtiroki muhokama qilindi.

Uchrashuvda muvaffaqiyatli tadbirkorlik faoliyatini yoʻlga qoʻygan vatandoshlar va yoshlar oʻrtasida muloqot maydonini yaratishga qaratilgan "Vatandoshlarning xalqaro biznes marafoni"ga start berildi.

Ishtirokchilar Oʻzbekiston va AQSh oʻrtasidagi savdo-iqtisodiy, investitsiyaviy, ilmiy va taʼlim aloqalarini kengaytirish va mustahkamlash, milliy iqtisodiyotning ustuvor sohalariga AQShning ilgʻor texnologiyalarini joriy etish, tibbiyot, transport va logistika sohalarida innovatsiyalarni ilgari surish, mamlakatimizda marketpleyslarni rivojlantirish boʻyicha oʻz takliflarini bildirdilar.

Davlat rahbari yigʻilganlarga Vatanimiz taraqqiyotiga qoʻshayotgan hissasi uchun minnatdorlik bildirib, aytilgan barcha taklif va tashabbuslar mamlakatimiz vazirlik va idoralari tomonidan puxta oʻrganib chiqilishi, eng istiqbollilari esa amaliyotga tatbiq etilishini taʼkidladi.

Oʻzbekiston prezidenti AQShda "El-yurt umidi" stipendiatlari soni 500 nafardan oshganiga alohida eʼtibor qaratdi. Isteʼdodli yoshlarni qoʻllab-quvvatlash, ularning bilim va tajribasini ona yurtda qoʻllash uchun imkoniyat yaratish davlat siyosatining asosiy ustuvor yoʻnalishlaridan biri ekanligini taʼkidladi.

Prezident Shavkat Mirziyoyev talabalarga oʻqishda va kelgusidagi kasbiy faoliyatlarida muvaffaqiyatlar tilab, davlatimiz yoshlarning tashabbuslariga doimo ochiqligi va ularni har tomonlama qoʻllab-quvvatlashga tayyor ekanligini taʼkidladi.

Oʻz navbatida, uchrashuv ishtirokchilari Oʻzbekiston yetakchisiga xorijdagi vatandoshlar va yoshlarga koʻrsatilayotgan eʼtibor, ularning salohiyatini roʻyobga chiqarish uchun yaratilayotgan sharoit va imkoniyatlar uchun minnatdorlik bildirib, Vatanimiz ravnaqiga yanada koʻproq hissa qoʻshishga tayyorligini bildirdilar.