Chempionlar ligasida oʻzbek klublari uchun necha million dollar tikilgan?

Jamoalarga turnirdagi ishtiroki, har bir gʻalabasi hamda keyingi bosqichlarga yoʻl olgani uchun OFK tomonidan yirik miqdorda mukofot pullari ajratiladi.

"Paxtakor" va "Neftchi" nufuzli Elite turnirning asosiy (liga) bosqichida qatnashgani uchun kafolatlangan 800 ming AQSH dollaridan qoʻlga kiritadi. Bundan tashqari, ushbu musobaqada jamoalar har bir gʻalaba uchun qoʻshimcha 100 ming dollar bonus ishlab olishlari mumkin. Klublarning umumiy daromadi ular qayd etadigan natijalar va gʻalabalar soniga qarab oshib boradi.

Musobaqaning pley-off bosqichida ham mukofot pullari sezilarli darajada yuqori. OFK Chempionlar ligasi Elite turnirida 1/8 finalga yoʻl olgan klubga 200 ming dollar, chorak final ishtirokchisiga 400 ming dollar, yarim finalga chiqqan jamoaga esa 600 ming dollar mukofot puli taqdim etiladi.

Musobaqa gʻolibi — turnir chempioni 10 million dollarlik bosh sovrinni qoʻlga kiritadi. Finalda magʻlub boʻlgan jamoaga 4 million dollar mukofot puli toʻlanadi. Bir soʻz bilan aytganda, "Paxtakor" va "Neftchi" musobaqada qancha uzoqqa borsa, shuncha koʻp daromad oladi — bu mablagʻ bir necha million dollarga yetishi mumkin.

"Nasaf" OFK Chempionlar ligasi 2 turnirini guruh bosqichidan boshlaydi. Ushbu bosqichda qatnashgani uchun qarshiliklarga kafolatlangan 300 ming dollar mukofot puli ajratiladi. Bundan tashqari, guruhdagi har bir gʻalaba uchun 50 ming dollardan qoʻshimcha bonus toʻlanishi koʻzda tutilgan.

OFK Chempionlar ligasi 2 turnirining pley-off bosqichida sovrinlar quyidagicha taqsimlanadi: 1/8 finalga chiqqan klub 80 ming dollar, chorak finalga yoʻl olgan jamoa 160 ming dollar, yarim final ishtirokchisi esa 240 ming dollar mukofot oladi.

Turnir gʻolibiga 2,5 million dollar, finalchiga 1 million dollar mukofot puli beriladi. Shunday qilib, "Nasaf" ham musobaqadagi muvaffaqiyatli natijalari evaziga boshlangʻich 300 ming dollarni (bir necha) million dollargacha koʻpaytirish imkoniyatiga ega.