«Surgʻil» siquv kompressor stansiyasi qurilishi boʻyicha asosiy ishlar yakunlandi

Siquv kompressor stansiyasi «Surgʻil» konidan qazib olinadigan tabiiy gaz bosimini oshirish va keyinchalik qayta ishlash maqsadida Ustyurt gaz-kimyo majmuasiga yuborish uchun moʻljallangan.

Qoraqalpogʻistondagi ushbu majmuada xomashyo gazi tarkibidan ajratib olinadigan qimmatbaho komponentlardan polimerlar ishlab chiqariladi. 

Loyihaning yillik quvvati 1,8 mlrd metr kub yoki sutkasiga 4,8 mln metr kub gazni tashkil etadi. Loyihaning bosh pudratchisi “Enter Engineering” kompaniyasi boʻlib, u samaradorlik va zamonaviy texnologik yechimlarni joriy etib kelmoqda.

Loyihaga koʻra, siquv kompressor stansiyasi ikkita parallel ishlaydigan gaz haydash agregatidan iborat. Ayni vaqtda yangi quvvatlarni barpo etish boʻyicha umumiy qurilish va montaj ishlari yakunlangan.

Gaz haydash agregatlarini ishga tushirish va sozlash ishlari boshlandi. Kompressor stansiyasining ishga tushirilishi «Surgil» konida gaz qazib olish hajmini sezilarli darajada oshirish hamda Ustyurt GKMga tabiiy gazni barqaror yetkazib berish orqali yuqori qoʻshilgan qiymatli mahsulotlar ishlab chiqarish uchun qoʻshimcha resurs bazasini shakllantirish imkonini beradi.

Bundan tashqari, yangi quvvatlar Ustyurt gaz qazib chiqarish boshqarmasi konlaridan past bosimli gazni siqishga yoʻnaltirish hisobiga gaz qazib olishni koʻpaytirish uchun imkon yaratadi.