Germaniyaning yetakchi kompaniyalari bilan tibbiy hamkorlik boʻyicha kelishuvlarga erishildi

Cogʻliqni saqlash vaziri oʻrinbosari F.Tashpulatov boshchiligidagi delegatsiya Oʻzbekiston – Germaniya Hukumatlararo qoʻshma komissiyasi yigʻilishi doirasida ushbu mamlakatda boʻldi.

Safar davomida vakillarimiz Germaniyaning yetakchi kompaniya va tashkilot rahbarlari bilan ikki tomonlama uchrashuvlar oʻtkazdi.

Dastlab “DZ Bank” boshqaruv kengashi aʼzosi Yoxen Anton-Boyk va Ralf Lerx bilan muloqot boʻlib oʻtdi. Unda Oʻzbekiston sogʻliqni saqlash sohasiga toʻgʻridan-toʻgʻri investitsiyalarni jalb qilish va davlat-xususiy sheriklik loyihalarida moliyaviy koʻmakdosh sifatida hamkorlikni yoʻlga qoʻyish masalasi atroflicha muhokama qilindi.

Yakunda Oʻzbekiston Sogʻliqni saqlash vazirligi va “DZ Bank” oʻrtasida potensial loyihalarni imtiyozlar doirasida moliyalashtirish boʻyicha hamkorlik memorandumi imzolandi.

Shundan soʻng “Opasko” kompaniyasi rahbari Aleksey Sverdlov va “Siemens Healthineers” masʼul xodimi Sebastyan bilan qator qoʻshma loyihalar yuzasidan hamkorlikni yoʻlga qoʻyish boʻyicha muzokaralar boʻlib oʻtdi.

Hamkorlik yoʻnalishlari quyidagilardan iborat:

Loyihalar doirasida olib kelingan tibbiy jihozlar bilan ishlovchi xodimlarni oʻqitish, malakasini oshirish, tibbiyot muassasalarida qoʻshma taʼlim dasturlari asosida kadrlar tayyorlash;

SIEMENS tibbiy jihozlariga uzluksiz kafolatlangan texnik xizmat koʻrsatishni yoʻlga qoʻyish;

SIEMENS kompaniyasi bilan hamkorlikni rivojlantirish, Oʻzbekistonda kompaniya texnik xizmat koʻrsatish markazini tashkil etish.

“AKA Bank” kompaniyasi boshqaruvchisi Mattias Vitbrok bilan oʻtgan uchrashuvda esa mamlakatimiz sogʻliqni saqlash tizimi haqida batafsil maʼlumot berilib, yakunda oʻzaro hamkorlik boʻyicha memorandum imzolandi. 

Bundan tashqari, “German Development KfW Bank”ning Osiyo davlatlarini salomatlik va ijtimoiy himoyalash missiyasi rahbari Martina Kox, “KfW bank” loyihalari boʻyicha tender/xarid jarayonlariga masʼul ekspert-mutaxassis Aleksandr Cheppiknap hamda Germaniya xalqaro hamkorlik jamiyati (GIZ)ning Sharqiy Bolqon, Markaziy Osiyo va Gʻarbiy Yevropa boʻyicha missiyasi rahbari Daniel Passon boshchiligidagi ekspertlar guruhi bilan oʻzaro hamkorlikdagi loyihalar yuzasidan muloqotlar tashkil etildi.

Shuningdek, “Drager” konsernining hududiy direktori Yuliy Nagel, “Mangold konsalting” va “BINZ” kompaniyalari rahbariyati bilan uchrashuvlarda Oʻzbekistonda tibbiy uskunalarni ishlab chiqarishni yoʻlga qoʻyish masalasi atroflicha muhokama qilindi.