Oʻzbekiston Sogʻliqni saqlash vazirining aholi va soha xodimlariga murojaat yoʻlladi

“Korrupsiya — davlat va jamiyat uchun jiddiy xavf. Shu bois yurtimizda barcha sohalar qatori sogʻliqni saqlash tizimida ham bu illatga qarshi keskin va murosasiz kurashish, turli byurokratik hamda inson omili bilan bogʻliq holatlarga barham berishga qaratilgan keng koʻlamli chora-tadbirlar amalga oshirilyapti.

Albatta, jamoatchilikning faol ishtiroki va yurtdoshlarimiz koʻmagisiz ushbu maqsad va marralarga erishish, tibbiyotni korrupsiyadan xoli, toʻlaqonli xalqchil tizimga aylantirish mushkul. Shu sababli bu yoʻnalishdagi saʼy-harakatlarimizni birlashtirish va oʻzaro hamkorlikda oʻz yechimini kutayotgan ogʻriqli muammolarimizni yelkama-yelka turib, samarali hal etish yuzasidan Sizlarga murojaat qilmoqdaman!

Prezidentimiz Shavkat Mirziyoyev taʼkidlaganlaridek, “Korrupsiyaga qarshi kurashish umummilliy vazifa, har bir vatanparvar yurtdoshimizning vijdon ishi. Korrupsiyaga “jamiyat tanasidagi saraton” sifatida qarash kerak”.

Shu maʼnoda, bugun sohadagi yutuqni – yutuq, kamchilikni – kamchilik, deb aytib, tizimdagi “kasalliklar”ga toʻgʻri tashxis qoʻyib, ularning davosini topishga birgalikda harakat qilishimiz zarur.

Ammo, afsuski, hali ham sogʻliqni saqlash muassasalarida korrupsiya, byurokratiya, taʼmagirlik, manfaatlar toʻqnashuvi kabi ayrim salbiy holatlar saqlanib qolyapti. Bu esa, tizimdagi islohotlar samaradorligiga putur yetkazib, xalqimizning tibbiyotga, fidoyi mutaxassislarimiz mehnatiga boʻlgan ishonchini zaiflashtirmoqda. 

Ana shu holatlardan kelib chiqib, tizimda korrupsiyaga qarshi kurashishning zamonaviy mexanizmlarini keng joriy etishga alohida eʼtibor qaratyapmiz. Soha faoliyatida ochiqlikni taʼminlash, jamoatchilik oldida hisobdorlikni oshirish boʻyicha zarur choralar koʻrilmoqda.

Xususan, qisqa vaqt ichida qator elektron modullarni oʻzida jamlagan Yagona tibbiyot axborot tizimi (DMED) yaratilib, amaliyotga tatbiq etilmoqda. Shuningdek, “Situatsion markaz” tashkil qilinishi sohada byudjet mablagʻlarining maqsadsiz sarflanishi hamda korrupsiya risklarini barvaqt aniqlash va oldini olishga xizmat qilayotgani bilan ahamiyatlidir.

Binobarin, tibbiyot xodimlarini ishga qabul qilishda raqamlashtirilgan yangi mexanizm ishga tushirilgani va Buxoro viloyatida tajriba-sinov loyihasi sifatida joriy etilgani muhim yangiliklar sirasidan. 

Oʻz navbatida, soha rahbar-kadrlari bugungi kun talablaridan kelib chiqib, zamonaviy menejment asoslari boʻyicha oʻqitilmoqda. Tibbiyot muassasalari hisobchilarining moliyaviy bilim va koʻnikmalarini oshirish boʻyicha oʻquv kurslari tashkil qilinyapti.

Albatta, bu hali yetarli emas. Oldinda oʻz yechimini kutayotgan muammolar, davlatimiz rahbari oldimizga qoʻygan talab va vazifalar koʻp. Buni toʻlaqonli uddalash uchun butun yurtdoshlarimiz birlashib kurashishi zarur. Shundan kelib chiqib, biz korrupsiyaga qarshi kurashishda kuchli jamoatchilik nazoratini oʻrnatishni muhim mezon, deb bilamiz. 

Hurmatli fuqarolar!

Vazirlik markaziy apparati, hududiy boshqarmalari, tizim tashkilotlari va muassasalari xodimlarining korrupsiyaviy xatti-harakatlariga guvoh boʻlsangiz yoki qonunchilikka zid boshqa huquqbuzarlik holatlariga aloqadorligi yuzasidan maʼlumotga ega boʻlsangiz, vazirlikning “1203” qisqa raqamli “Ishonch telefoni” hamda https://t.me/ssvantikor_bot rasmiy telegram boti yoxud info@ssv.uz elektron pochta manzili orqali oʻz murojaatingizni yoʻllashingiz mumkin.

Shu oʻrinda, nafaqat korrupsion holatlarni barataraf  etish, balki sohani yanada takomillashtirishda Sizning fikr va mulohazalaringiz biz uchun juda muhim ekanligini yana bir bor eslatib oʻtmoqchiman. Har bir murojaat Sogʻliqni saqlash vazirligi tomonidan qisqa muddatlarda koʻrib chiqilib, zarur amaliy choralar koʻrilishini maʼlum qilaman”.