Surxondaryoda yuk mashinasi odamlarni bosib ketdi

Qayd etilishicha, "Captiva" avtomashinasi haydovchisi va uning ikki nafar yoʻlovchisi M-39 avtomobil yoʻlining Boysun tumani hududidan oʻtgan qismida yoʻl chetida toʻxtab, mashinaga yonilgʻi quyayotganda "Isuzu" yuk mashinasi ularni urib yuborib,  voqea joyidan qochib ketgan. 

Yuk mashina urishi oqibatida "Captiva" haydovchisi va bir nafar yoʻlovchi ogʻir tan jarohati olgan va voqea joyida halok boʻlgan. Ikkinchi yoʻlovchi esa shifoxonaga yotqizilgan.

"Masʼullar tomonidan olib borilgan tezkor choralar natijasida gumondor yuk mashinasi bilan Sirdaryo viloyati hududida harakatlanayotgani maʼlum boʻlgan. Soʻng 56 yoshli haydovchi tegishli tartibda ushlanib, Boysun tuman IIBga olib borilgan", deyiladi xabarda.

Ikkita fuqaroning oʻlimiga sabab boʻlgan fuqaroga nisbatan jinoyat ishi qoʻzgʻatilib, gumondor protsessual tartibda qamoqqa olingan. 

Eslatib oʻtamiz, avvalroq Qashqadaryo viloyatida "Mersedes-Benz" hamda "Labo" avtomobillarining toʻqnashib ketishi oqibatida ham ikki kishi halok boʻlgani haqida xabar bergan edik.