Oʻzbekiston fuqarosi AQSh sanksiyalariga tushdi

AQSh Davlat departamenti Amerika intellektual mulkini himoya qilish toʻgʻrisidagi qonun (PAIPA) doirasida sanksiyalar roʻyxatini yangiladi. Unga koʻra, AQSh fuqarolarining tijorat sirlarini oʻgʻirlash, kiberhujumlar uyushtirish, axborot tizimlariga noqonuniy aralashish va kiberjosuslik bilan shugʻullangan shaxslar hamda tashkilotlarga nisbatan cheklov choralari qoʻllanilgan.

Yangilangan roʻyxatga Oʻzbekiston fuqarosi Azizjon Mamashov va uning BAAda roʻyxatdan oʻtgan Advanced SecuritySolution kompaniyasi kiritilgan.

Rasmiy maʼlumotlarga koʻra, Mamashov uch nafar rossiyalik xaker bilan birgalikda AQSh mudofaa sektori uchun moʻljallangan “nol-day” (zero-day) ekspluatatsiya vositalarini oʻgʻirlash va noqonuniy sotishda ishtirok etgan. Qayd etilishicha, ushbu kibervositalar keyinchalik boshqa tuzilmalarga qayta sotilgan.

AQSh rasmiylari bu harakatlar mamlakat milliy xavfsizligi va iqtisodiy manfaatlariga tahdid solganini taʼkidlamoqda.