Buxoroda uyda saqlangan sher bolasi hayvonot bogʻiga topshirildi

Qayd etilishicha, mazkur holat Buxoro viloyati Ekologiya boshqarmasi, tuman Ichki ishlar boʻlimi va Milliy gvardiya xodimlari tomonidan oʻrganilgan. Tekshiruv natijasida fuqaro tegishli ruxsatnomasiz yovvoyi  asrab kelayotgani tasdiqlangan.

"Holat yuzasidan Oʻzbekiston Respublikasi Maʼmuriy javobgarlik toʻgʻrisidagi kodeksining 92-prim 1-moddasi 1-qismi asosida huquqbuzarga nisbatan maʼmuriy bayonnoma rasmiylashtirilib, ish sud organlariga yuborildi. Sher bolasi esa vaqtinchalik hayvonot bogʻiga joylashtirildi. Sud qarori eʼlon qilinganidan soʻng qoʻshimcha maʼlumot taqdim etiladi", deyiladi boshqarma xabarida.

Maʼlumot uchun, Oʻzbekiston Respublikasi Vazirlar Mahkamasining 2024 yil 5 noyabrdagi 736-sonli qaroriga muvofiq, 2025 yil 1 yanvardan boshlab jismoniy shaxslarga ayrim yovvoyi hayvonlarni yarim erkin sharoitda, sunʼiy yaratilgan yashash joylarida yoki tutqunlikda saqlash taqiqlangan. Shuningdek, ushbu hayvonlardan davlat va koʻchma sirklarda (chodirlarda) tomoshalar uchun foydalanish ham man etilgan. 

Qarorga binoan, taqiqlangan hayvonlar faqatgina Ekologiya, atrof-muhitni muhofaza qilish va iqlim oʻzgarishi vazirligining tegishli ruxsatnomasiga ega yuridik shaxslar tomonidan hayvonot bogʻlari, pitomniklar (terrarium, okeanarium va boshqalar)da saqlanishi mumkin.

Shu bilan birga, Oʻzbekiston Respublikasi Qizil kitobiga kiritilgan yovvoyi va zaharli hayvonlar maxsus pitomniklarda boqilishi lozim.