Gaz va elektr energiyasi kompensatsiyasini my.gov.uz platformasida rasmiylashtirish mumkin

Kuz-qish va yoz oylarida energiya resurslari xarajatini kamaytirish maqsadida ehtiyojmand oilalarga davlat tomonidan kompensatsiya to‘lanishi joriy etildi. 

Endi buni uydan chiqmay turib rasmiylashtirish mumkin. Bu haqda Yagona portal telegram kanalida e’lon qilindi.

Mazkur xizmatdan:

• Ijtimoiy reyestrga kiritilgan;
• Reyestrga kiritilmagan, biroq moddiy ahvoli bo‘yicha “davlat ta’minotidagi oila” yoki “kambag‘al oila” toifasidagi mezonlarga mos;
• oiladagi jon boshiga to‘g‘ri keladigan daromadi minimal iste’mol xarajatlarining 1,5 barobaridan oshmaydigan oilalar foydalana oladi.

Kompensatsiya bazaviy me’yordan oshgan quyidagi iste’mol hajmi uchun ajratiladi:

Elektr energiyasi: oyiga 150 kVt·soatgacha;

Tabiiy gaz: isitish mavsumida oyiga 250 kub metrgacha, boshqa oylarda esa oyiga 150 kub metrgacha.

Arizani onlayn tarzda my.gov.uz orqali yoki davlat xizmatlari markazi, “Inson” markazlari yoki mahalladagi ijtimoiy xodim orqali oflayn topshirish mumkin.

Ariza har oyning 16-sanasiga qadar qabul qilinadi. 16-sanadan keyingilari navbatdagi oyga o‘tadi.

To‘lov tartibi

Kompensatsiya tasdiqlangach, mablag‘ keyingi oyning 27-sanasiga qadar “Xalq banki” orqali fuqaroning ijtimoiy yoki bank kartasiga o‘tkazib beriladi. Natija haqida SMS va shaxsiy kabinetga xabarnoma keladi.

Xizmatdan foydalanish mutlaqo bepul.