"Qoʻli qichigan" oʻqituvchi endi direktor oʻrinbosarini kaltakladi

Unda yozilishicha, joriy yilning 24 sentabr kuni 1980 yilda tugʻilgan R.O. qizi J.R. (2010 yilda tugʻilgan) tahsil oladigan Yashnobod tumanidagi 204-umumiy oʻrta taʼlim maktabiga borib, maktab rahbariyati bilan tortishib qolgan. Shundan soʻng maktab direktorining MMIB (maʼnaviy-maʼrifiy ishlar boʻyicha) oʻrinbosari Gʻ.M.ga nisbatan jismoniy kuch ishlatgan.

"Ayoldan jamoat joyida tartibiga rioya qilishi soʻralganida, maktab hududida Milliy gvardiya va IIO xodimlariga nisbatan gʻayriijtimoiy munosabatda boʻlib, ularning qonuniy talablarini bajarmasdan keskin qarshilik koʻrsatgan. Ushbu noqonuniy harakatlarini R.O. koʻplab maktab oʻquvchilari koʻz oʻngida sodir etgan", deyiladi ombudsman xabarida.

25 sentabr kuni jinoyat ishlari boʻyicha Yashnobod tuman sudida mazkur ish koʻrib chiqilgan. R.O. sud tomonidan Maʼmuriy javobgarlik toʻgʻrisidagi kodeksning 183-moddasi (mayda bezorilik), 194-moddasining 1-qismi (Ichki ishlar organlari xodimining qonuniy talablarini bajarmaslik) va 197 (5) moddasi (taʼlim tashkiloti pedagog xodimining kasbiy faoliyatiga qonunga xilof ravishda aralashish yoki oʻz xizmat vazifalarini bajarishiga toʻsqinlik qilish) bilan aybdor deb topilgan. 

Unga nisbatan BHMning 3 baravari (1 020 000 soʻm) hamda 7 baravari (2 380 000 soʻm) jarima tayinlangan. Shuningdek, uzil-kesil jazo sifatida 7 sutka maʼmuriy qamoq chorasi qoʻllanilgan. Bu faqatgina direktor oʻrinbosariga nisbatan qilgan xatti-harakatlari uchun jazo edi. 

Hozirda R.O.ning Chilonzor tumanidagi 188-sonli umumtaʼlim maktabda 6-sinf oʻquvchisiga nisbatan sodir etgan harakati yuzasidan tergovga qadar tekshiruv harakatlari olib borilmoqda. 

Bolalar ombudsmaniga koʻra, pedagog va tarbiyachilar tegishli vazifa yoki lavozimga tayinlanishidan avval maxsus psixologik koʻrikdan oʻtkazilishi kerak. Nomunosib xulqli, bola sogʻligʻi uchun xavfli shaxslar taʼlim-tarbiya muassasalarida faoliyat yuritishiga yoʻl qoʻyish mumkin emas. 

Eslatib oʻtamiz, bundan oldin Rossiya Tashqi ishlar vazirligi matbuot kotibi Mariya Zaxarova Oʻzbekistonning ichki ishiga aralashib, Chilonzor tumani 188-maktabda yuz bergan holat boʻyicha Oʻzbekiston hukumatidan bu vaziyatga izoh berishini soʻragan edi.