Qurilish vaziri: 2018 yildan beri 38 ming xonalik koʻp qavatli uylar noqonuniy qurilgan

Oʻzbekistonda 2018–2019 yillardan buyon qurilgan 38 ming xonalik koʻp qavatli uylar noqonuniy deb topilgan. Bu haqda Qurilish va uy-joy kommunal xoʻjaligi vaziri Sherzod Hidoyatov 17 dekabr kuni tadbirkorlar bilan oʻtkazilgan ochiq muloqotda maʼlum qildi.

Vazirning aytishicha, ayrim obʼektlar yer ajratish va hokim qaroriciz, boshqalari arxitektura-shaharsozlik kengashi yoki davlat ekspertizasidan oʻtkazilmasdan qurilgan. Shuningdek, ekspertizadan oʻtgan loyihalar ham ayrim holatlarda nazorat inspeksiyasida roʻyxatdan oʻtkazilmagan.

Maʼlum qilinishicha, mazkur uylar boʻyicha ishchi guruh tashkil etilgan. Binolar joyiga chiqib oʻrganiladi va zilzilabardoshligi texnik hamda instrumental tekshiruvlar orqali baholanadi. Shundan soʻng ularning taqdiri boʻyicha qonuniy qaror qabul qilinadi.

Shu bilan birga, noqonuniy qurilish qilgan tadbirkorlarga nisbatan jarima va boshqa choralar koʻrish boʻyicha huquqni muhofaza qiluvchi organlar orqali ish olib borilayotgani bildirildi.