Rossiya migrantlar uchun bepul tibbiy yordam tartibini cheklamoqda

Bepul tibbiy yordam — faqat 5 yillik stajdan soʻng

Davlat dumasi raisi Vyacheslav Volodinning taʼkidlashicha, bepul tibbiy yordam faqat Rossiyada kamida besh yil qonuniy asosda ishlagan migrantlarga koʻrsatiladi. Faqat favqulodda holatlar istisno qilinadi.

«Rossiyada ishlashni xohlagan va yuqori ijtimoiy kafolatlardan foydalanishni istaganlar bu imkoniyatga halol va qonuniy mehnat orqali erishishi kerak», — dedi Volodin.

Hozirgi kunda MTS polisini olish uchun 3 yillik ish staji yetarli edi. Qonun kuchga kirgach, talab etiladigan staj 5 yil etib belgilanadi.

Yangi tartib kimlarga tatbiq etilmaydi?

• Yuqori malakaga ega mutaxassislar — amaldagi qoidalar asosida MTS polisini olish huquqida qoladi.
• JSTga aʼzo mamlakatlar kompaniyalarining Rossiyadagi filial va vakolatxonalariga yuborilgan xodimlar — imtiyozli tartib saqlanadi.

Hujjat Rossiya prezidenti imzolaganidan soʻng kuchga kiradi.

Avvalroq Rossiya prezidenti Vladimir Putin 2026–2030 yillarga moʻljallangan yangi migratsiya siyosati konsepsiyasini tasdiqlagandi. Unda 2030 yilgacha migrantlar oqimi oʻsishi davom etishi qayd etilgan.

Sentabr oyida Rossiyada ishlamaydigan migrant oilalari uchun pullik yashash tartibini joriy etish taklifi berilgan edi.

1 sentabrdan boshlab migrantlar uchun roʻyxatdan oʻtish, migratsiya hisobi va mehnat faoliyatiga ruxsat olish bilan bogʻliq davlat bojlari oshirilgan.