Sud Abduraxmon Tashanovga nisbatan qoʻzgʻatilgan maʼmuriy ishni rad etdi

Bu haqda Tashanov feysbuk sahifasida maʼlum qildi.

Uning aytishicha, sud ishni koʻrib chiqish uchun asos boʻlgan materiallarda jabrlanuvchi yoki arizachi mavjud emasligi sababli ishni koʻrishni rad etgan.

Tashanovning taʼkidlashicha, maʼmuriy ish materiallari maxfiylashtirilgani va sud jarayoni yopiq tarzda oʻtgani bois ish tafsilotlarini toʻliq ochiqlash imkoni yoʻq. Shu bilan birga, agar ish materiallari qayta taqdim etilsa, ayblov asossiz ekani yanada oydinlashishini bildirgan.

U sud qarorini adolatning qaror topishi sifatida baholab, Mirobod tumani sudiga minnatdorlik bildirgan.

Avvalroq, Tashanovga nisbatan Maʼmuriy javobgarlik toʻgʻrisidagi kodeksning 202(2)-moddasi 1-qismi (yolgʻon xabar tarqatish) asosida ish qoʻzgʻatilgani xabar qilingan edi.

Tashanovning maʼlum qilishicha, mazkur ish uning Facebook sahifasida yozgan postlari va ommaviy axborot vositalariga bergan intervyulari bilan bogʻliq boʻlgan. U oʻz chiqishlarida fuqarolarning inson huquqlari bilan bogʻliq murojaatlari hamda rasmiy hujjatlarga asoslangan maʼlumotlarni yoritganini taʼkidlagan.