Афғонистондан Ўзбекистонга олиб кирилган ҳарбий техникалар кимга тегишли?

АҚШнинг Ўзбекистондаги элчиси Жонатан Хеник Афғонистонда "Толибон" ҳукумати ўрнатилганидан кейин, 2021 йилда Афғонистондан Ўзбекистонга олиб ўтилган Америкага тегишли ҳарбий авиатехникалар масаласида АҚШ ва Ўзбекистон келишувга эришганини айтди. Бу ҳақда элчи "Amerika Ovozi"га берган интервьюсида маълум қилди.

Сиёсат

17.10.2024, 16:04

Lotinchada

Улашиш:

Afgʻonistondan Oʻzbekistonga olib kirilgan harbiy texnikalar kimga tegishli?

"Amerika Ovozi" журналисти Навбаҳор Имамова элчидан 2021 йилда афғон ҳарбийлари томонидан Ўзбекистонга олиб ўтилган авиатехникаларнинг тақдири қандай кечишини сўрар экан, элчи бунга жавобан мазкур мавзуни давом эттириш ўринсиз эканлигини ва аллақачон бу масала ўз ечимини топганини билдирди.

"Бу мавзу ҳақида мулоқотни давом эттириш ўринсиз. Муаммо аллақачон ҳал қилинган деб ўйлайман. Дастур тафсилотларини ҳозирча муҳокама қилолмаймиз", дея элчи интервьюда қисқа жавоб берди.

Шунингдек, у журналистнинг навбатдаги саволига ҳам, яъни ўз вақтида "Толибон" томонидан элчига қарата билдирилган эътирозлар вазиятни ўзгартирадими дея берган саволига бу ҳақида ҳеч қандай изоҳ йўқ деб жавоб қайтарган.

Маълумот учун, жорий йилнинг август ойида Жонатан Xеник афғонлар томонидан АҚШдан ўғирланган ҳарбий самолётлар ва вертолётлар Ўзбекистонда қолиши бўйича АҚШ – Ўзбекистон томонлари битим имзолаганини айтган эди.

Бунга жавобан "Толибон" Мудофаа вазирлиги Х тармоғида Хеникнинг бу гапига АҚШ Афғонистоннинг Ўзбекистондаги вертолёт- самолётлари ва Афғон халқининг мол-мулкини хайрия ёки мусодара қилиш ҳуқуқига эга эмаслигини эслатиб ўтганди. Бундан ташқари, "Толибон" ҳукумати Ўзбекистонни бу каби ҳар қандай келишувлардан воз кечишга чақирган.

Сиёсатшунос Ҳамза Болтаевнинг PARADIGMA.UZ'га маълум қилишича, халқаро ҳуқуқ нуқтаи назаридан бу ҳарбий самолётлар "Толибон"га тегишли эмас.

"Бу қурол-яроғларнинг баъзилари ҳақиқатдан ҳам Америкага тегишли, баъзилари олдинги Афғонистон Ислом Республикасига келишилган шартномалар орқали берилган. Агар халқаро ҳуқуқ нуқтаи назаридан айтадиган бўлсак, ҳозирги "Толибон"ни ҳеч ким тан олмаган. Агар тан олинмаган бўлса, "Толибон" олдинги Афғонистон Ислом Республикасининг қонуний давомчиси эмас.

Халқаро ҳуқуқ томонидан айтадиган бўлсак, бу қурол-аслаҳалар олдинги Афғонистон ҳукуматига тегишли бўлганда ҳам "Толибон"га тегишли эмас. Расмий ҳужжатлар бўйича айтганда, уларнинг чиқиб гапиришларидан бунга асоси йўқ", дейди сиёсатшунос.

Сиёсат

17.10.2024, 16:04

Улашиш:

#АҚШ #Толибон #авиатехника

мавзуга оид янгиликлар