Алламжоновга қилинган суиқасд фейк эмас, рост. Ҳолатга расмий баёнот берилди

Аввалроқ собиқ Президент Администрацияси Ахборот сиёсати департаментининг раҳбари Комил Алламжоновга суиқасд уюштирилгани ҳақида хабар берган эдик. Мазкур ҳолат бўйича расмий баёнот эълон қилинди. Изоҳда Алламжонов ичида бўлган "Range Rover" русумли автомашинага икки нафар номаълум шахс ўқ узиб қочгани ёзилган. Шунингдек, ушбу ҳолат юзасидан жиноят иши қўзғатилган.

Ўзбекистон

26.10.2024, 12:30

Lotinchada

Улашиш:

Бош прокуратура ахборот хизматига кўра, воқеа бугун, 26 октябрь куни тунги соат 01:40 ларда Тошкент вилояти Қибрай тумани Ифор кўчасида содир бўлган. Шу кўча бўйлаб ҳаракатланиб келаётган, фуқаро С.С.нинг бошқарувида бўлган "Range Rover" русумли автомашинага икки нафар номаълум шахс ўқотар қуролидан бир неча маротаба ўқ узиб, воқеа жойидан яширинган. Ҳодиса оқибатида ҳеч ким тан жароҳати олмаган.

"Юқоридаги ҳодиса юзасидан Жиноят кодексининг 25, 97-моддаси (Қасддан одам ўлдиришга суиқасд қилиш) билан жиноят иши қўзғатилди. Гумон қилинувчи шахсларни аниқлаш ва ушлаш юзасидан тезкор-қидирув тадбирлари амалга оширилмоқда. Ҳозирда тегишли идораларнинг малакали ходимларидан иборат тезкор-тергов гуруҳи тузилиб, тергов ҳаракатлари олиб борилмоқда", дейилади прокуратура баёнотида.

Комил Алламжоновга уюштирилган суиқасд ижтимоий тармоқ фаоллари томонидан турлича талқин қилинмоқда, жумладан, журналист Анора Содиқова Алламжоновга қилинган суиқасд фейк эмас эканлигини билдириб, қаттиқ хавотирда эканлигини ёзган.

"Демак, Алламжоновга қилинган суиқасд фейк эмас, рост. Қаттиқ хавотирдамиз. Расмий баёнот эълон қилинди. Унда бу тасдиқланди", деб ёзади журналист.

"Gazeta.uz" бош муҳаррири Муҳрим Агзамкҳоджаев эса "Gazeta.uz" нашрида эълон қилинган хабарни Telegram’даги саҳифасида улашиб, Алламжоновга суиқасд уюштирилганини тасдиқлаган.