Allamjonovga qilingan suiqasd feyk emas, rost. Holatga rasmiy bayonot berildi

Bosh prokuratura axborot xizmatiga koʻra, voqea bugun, 26 oktabr kuni tungi soat 01:40 larda Toshkent viloyati Qibray tumani Ifor koʻchasida sodir boʻlgan. Shu koʻcha boʻylab harakatlanib kelayotgan, fuqaro S.S.ning boshqaruvida boʻlgan "Range Rover" rusumli avtomashinaga ikki nafar nomaʼlum shaxs oʻqotar qurolidan bir necha marotaba oʻq uzib, voqea joyidan yashiringan. Hodisa oqibatida hech kim tan jarohati olmagan. 

"Yuqoridagi hodisa yuzasidan Jinoyat kodeksining 25, 97-moddasi (Qasddan odam oʻldirishga suiqasd qilish) bilan jinoyat ishi qoʻzgʻatildi. Gumon qilinuvchi shaxslarni aniqlash va ushlash yuzasidan tezkor-qidiruv tadbirlari amalga oshirilmoqda. Hozirda tegishli idoralarning malakali xodimlaridan iborat tezkor-tergov guruhi tuzilib, tergov harakatlari olib borilmoqda", deyiladi prokuratura bayonotida.

Komil Allamjonovga uyushtirilgan suiqasd ijtimoiy tarmoq faollari tomonidan turlicha talqin qilinmoqda, jumladan, jurnalist Anora Sodiqova Allamjonovga qilingan suiqasd feyk emas ekanligini bildirib, qattiq xavotirda ekanligini yozgan. 

"Demak, Allamjonovga qilingan suiqasd feyk emas, rost. Qattiq xavotirdamiz. Rasmiy bayonot eʼlon qilindi. Unda bu tasdiqlandi", deb yozadi jurnalist.

"Gazeta.uz" bosh muharriri Muhrim Agzamkhodjayev esa "Gazeta.uz" nashrida eʼlon qilingan xabarni Telegram’dagi sahifasida ulashib, Allamjonovga suiqasd uyushtirilganini tasdiqlagan.  

"Dasturimizni yana Qibray yangiliklari bilan davom ettiramiz", deya kanaliga rasm joylagan u.