Эрдўған: “Туркия Ғазода инсон ҳуқуқлари ва адолатни ҳимоя қилади”

Туркия дипломатик мактублар, телефон мулоқотлари, халқаро алоқалар ва 102 минг тоннадан ортиқ инсонпарварлик ёрдамини тақдим этиш орқали Ғазо секторида инсон ҳуқуқлари ва адолатни ҳимоя қилмоқда.

Бу ҳақда президент Ражаб Тоййиб Эрдўған Малазгирт ғалабасининг 954 йиллигига бағишланган тадбирдаги сўзи давомида тўхталиб ўтди.

«Туркия Фаластин масаласини барча майдонларда ҳимоя қилади ва Ғазода ўз биродарларини Исроилнинг шафқатсиз зулмлари олдида ҳеч қачон ёлғиз қолдирмайди», — деди турк раҳбари.

Суриядаги вазият ҳақида гапирар экан, давлат раҳбари Туркия бу мамлакатда яшовчи барча этник гуруҳлар учун хавфсизлик кафолатчиси сифатида ҳаракат қилаётганини таъкидлади. «Туркия курдлар ва Суриядаги барча биродар халқлар учун хавфсизлик, тинчлик ва фаровонлик кафолатчисидир. Анқара ва Дамашққа юзланадиганлар бундан фойда кўради», — деди у.

Президент шунингдек, Анқара бутун минтақа бўйлаб барқарор тинчлик ўрнатиш, муаммо ва келишмовчиликларни мулоқот ва дипломатия орқали ҳал қилиш тарафдори эканини таъкидлади.