Ўзбекистон cтартаплар бўйича «Йил мамлакати» деб эълон қилинди

Марказий Осиё дунёдаги энг тез ўсаётган стартап субминтақасига айланди. StartupBlink нинг Global Startup Ecosystem Index 2026 ҳисоботига кўра, минтақа сўнгги икки ярим йилда 81 фоиз ўсишни қайд этган — бу барча субминтақалар орасида энг юқори кўрсаткич. Таққослаш учун: Жанубий Осиё 27,5 фоиз, Шарқий Европа 13 фоиз ўсган.

Бу ўсишнинг асосий икки ҳаракатлантирувчиси — Тошкент ва Олмаота. Ўзбекистон глобал рейтингда 19 поғона кўтарилиб, 79-ўринни эгаллади. Йиллик ўсиш эса 227,3 фоизни ташкил қиляпти. Бу индексдаги энг юқори кўрсаткич.

Динамика қуйидагича: 2023 йилда 111-ўрин, 2024 йилда 110-ўрин, 2025 йилда 98-ўрин ва 2026 йилда 79-ўрин. Яъни уч йилда 32 поғона. Шу натижа учун StartupBlink Ўзбекистонни «Йил мамлакати» деб эълон қилибди.

Шаҳарлар даражасида ҳам ўзгариш кескин: Тошкент 121 поғонага кўтарилиб, 229-ўринга чиқди, ўсиш 155,7 фоизни ташкил этди. Ҳисоботда у Марказий Осиёдаги энг юқори ўринли ва энг тез ўсаётган стартап шаҳри деб таърифланган. Энг қизиқ деталь эса пойтахтдан ташқарида. Самарқанд 814-ўрин, Фарғона 863-ўринни эгаллаб, дунёнинг энг яхши 1000 та стартап экотизими рўйхатига биринчи марта кирди.

Ҳисобот тузувчилари алоҳида изоҳ ҳам берган: уларнинг фикрича, Ўзбекистон минтақавий технологик хабга айланиш учун жиддий ҳаракат қиляпти ва бу интилиш барча даражада кўринади. IT Park Uzbekistan эса мамлакат стартап ўсишининг марказий устунига айлангани таъкидланган.

Қўшнилар билан солиштирсак, манзара мураккаброқ. Қозоғистон 71-ўринда — Ўзбекистондан юқори, лекин йиллик ўсиши 26,5 фоиз ва у бир поғона пастга тушган. Олмаота 291-ўрин, Остона 332-ўринда. Ҳисоботда бунинг сабаби ҳам айтилган: Олмаота ва Остонанинг етакчилик учун ўзаро рақобати умумий ўсишга тўсқинлик қилаётган бўлиши мумкин. Кавказда эса Арманистон 55-ўрин билан етакчи, Грузия 66-ўринга кўтарилган, Озарбайжон 81-ўринга тушган.