Фестиваллар ўтказиш битта кўчани асфалт қилгандан кўра муҳимроқ – Озодбек Назарбеков

 Давлат бюджетидан миллиардлаб маблағ сарфлаб фестивал ва тадбирбозликлар қилиш ҳар доим муҳокамали мавзу бўлган. Маданият вазирлиги ёки Туризм қўмитаси ушбу фестивалларга қанча маблағ сарфлаётганини доим ҳам очиқламайди.
Маданият вазирлиги томонидан ёш истеъдодларни аниқлашни мақсад қилган “Овоз” лойиҳасининг ҳали муҳокамалари якунланмай туриб, вазирнинг айни кунларда Самарқанд шаҳрида ўтказилаётган “Шарқ тароналари” фестивалидаги нутқи яна муҳокамалар марказига тушди. Маданият вазири тадбирда бу каби фестивалларни ўтказишдан асосий мақсад нималиги ҳақида айтиб, интервюси давомида фестиваллар ўтказиш битта кўчани асфалт қилгандан кўра муҳимроқ эканини таъкидлаган. 
“Сизлар кўп савол берасизлар бизга: мақом фестивали қиляпсизлар, бахшичилик, ҳунармандлар фестиваллари қиляпсизлар, булар керакми, ундан кўра асфалт қилган яхшимасми, деган миллионта ҳар хил фикрлар бор. Лекин ҳозир бу, кечирасиз-у, битта кўчани асфалт қилгандан кўра муҳимроқ. 
Чунки инсон маданиятига таҳдид бостириб келяпти, шунинг учун бунақа фестивалларга 3−5 млрд сўм ишлатиш, менимча, инсон келажагини асраб қолишда жуда муҳим. Маданият вазири сифатида бунга асфалтдан ҳам муҳимроқ, бошқа нарсалардан ҳам ўта муҳим бўлган масала, деб қарайман”, деган Озодбек Назарбеков.

Маданият вазири асфалциз кўчада яшашни ёки шундай чангга ботган далада фестивал қилишни бир ўйлаб кўрганмикан? Давлат бюджети халқ тўлайдиган солиқлардан шакллантирилишини, аслида у ҳам халқнинг пули эканлигиничи? 
Бундан ташқари, бундай фестиваллар кўп ҳолларда халқнинг доимий қулай шароитини ноқулайлаштиради. Масалан, Самарқандда ўтказилинаётган фестивал учун кўплаб йўллар ёпилган. Ўтган йили Бухорода ўтказилган Зираворлар фестивали бўладиган жой олдиндан репетиция учун ёпилиб чет эл ва маҳаллий сайёҳлар киритилмагани айтилган эди. 
Халқнинг 3-5 млрд маблағи аввало уларнинг қулай шароити учун эмасми? Ёки уларга фақат кўрмоқ бор, емоқ йўқми? Айни кунларда пойтахтнинг гавжум метро бекатлари олдида қадам босишга жой қолмаган, одамлар оиласидан узоқда кимнингдир номига кредит олиб, қарз қилиб маҳалласидаги йўл, мактабни таъмирлашга маблағ ажратиш учун пул сарфлаб овоз йиғиб юрибди. Ҳурматли вазир уларга фестивалнинг қизиғи йўқ!

Маълумот учун, Озодбек Назарбеков бундан олдин Аокада вазирликнинг фаолиятига бағишланган матбуот анжуманида журналистларнинг “Овоз” лойиҳаси учун сарфланган маблағлари муҳокамаларга сабаб бўлгани, ўзи шундай лойиҳа керакми мазмунидаги саволига “Лойиҳага кетган маблағларни муҳокама қилаверсангиз уйимни сотиб бўлса ҳам тўлаб бераман” деган эди.

Савол: Вазирнинг уйи шунча қиммат турадими?

Бундан ташқари журналистларни қўштирноқ ичида яхшигина кимгадур хизмат қилишда айблаган вазир кийим дўконини реклама қилиб юрганда ва қарға қарғанинг кўзини чўқимайди деганларидек Рақобат қўмитаси кийим дўконга жарима қўллаб, маданият вазирини беайб эканлигини айтган.

Маданият вазири яна бир матбуот анжуманида маданият соҳасига кўп маблағ ажратилмаслигини айтган эди. Вазир фестиваллардан ва амалдорлар тушуриб юрадиган “Йил қовуни” номинацияси учун курашдан бўшаганда вилоятлардаги маданият марказлари ҳолати ва ходимлар савияси билан ҳам шуғулланар деб умид қиламиз.