Қозоғистон 6 млн тонна нефтьни қазиб ололмади

Айтилишича, қазиб олинмай қолган нефть ер остида қолган, бироқ иқтисодий жараёнларда иштирок этмаяпти.

Қозоғистон энергетика вазири ўринбосари Ерлан Акбаров маълумотига кўра, 2026 йилнинг январь–сентябрь ойларида мамлакатда 69,4 млн тонна нефть қазиб олинган. Бу 2025 йилнинг шу давридаги кўрсаткичнинг 91,7 фоизига тенг.

Йўқотилган ҳажмнинг бир қисмини қоплаш учун Қашаган ва Тенгиз конларидаги режали профилактик таъмирлаш ишлари бошқа муддатга кўчирилди. Шунингдек, ҳукумат йирик конларни ўзлаштирувчи компаниялар билан нефть қазиб олишни ошириш бўйича музокаралар олиб бормоқда.

Қозоғистоннинг 2026 йил учун нефть қазиб олиш прогнози 96 млн тоннани ташкил этади. 

2025 йилда мамлакат 99,55 млн тонна нефть қазиб олган.

Йил давомида Тенгиз конида бир нечта техник ҳодиса юз берган. 18 январь куни ГТЭС-4 электр станцияси трансформаторларида ёнғин чиқиши оқибатида нефть қазиб олиш қарийб бир ойга тўхтатилган. 11 март куни каустик нейтраллаш қурилмасида ёнғин содир бўлган, 26 май куни эса кон оператори «Тенгизшевройл» операцион носозлик ҳақида хабар берган.

Қозоғистон нефтини Қора денгиз соҳилидаги Новороссийск яқинида жойлашган терминалга етказиб берувчи Каспий қувур консорциуми инфратузилмасида ҳам муаммолар кузатилган. 2026 йилда консорциумнинг Қора денгиздаги объектлари ва нефть ташувчи танкерларга бир неча бор Украина дронлари ҳужум қилгани хабар қилинган. Ҳодисалардан кейин нефть юклаш вақтинча тўхтатилган ва Қозоғистон қазиб олиш ҳажмини камайтиришга мажбур бўлган.