Qozog‘iston Tengizdagi avariya sababli 6 mln tonna neft qazib ololmadi

Vazirning 13-oktabr kuni o‘tkazilgan brifingda aytishicha, qazib olinmay qolgan neft yer ostida qolgan, biroq iqtisodiy jarayonlarda ishtirok etmayapti.

Qozog‘iston Energetika vaziri o‘rinbosari Yerlan Akbarov ma’lumotiga ko‘ra, 2026-yilning yanvar–sentabr oylarida mamlakatda 69,4 mln tonna neft qazib olingan. Bu 2025-yilning shu davridagi ko‘rsatkichning 91,7 foiziga teng.

Yo‘qotilgan hajmning bir qismini qoplash uchun Qashag‘an va Tengiz konlaridagi rejali profilaktik ta’mirlash ishlari boshqa muddatga ko‘chirildi. Shuningdek, hukumat yirik konlarni o‘zlashtiruvchi kompaniyalar bilan neft qazib olishni oshirish bo‘yicha muzokaralar olib bormoqda.

Qozog‘istonning 2026-yil uchun neft qazib olish prognozi 96 mln tonnani tashkil etadi. 

2025-yilda mamlakat 99,55 mln tonna neft qazib olgan.

Yil davomida Tengiz konida bir nechta texnik hodisa yuz bergan. 18-yanvar kuni GTES-4 elektr stansiyasi transformatorlarida yong‘in chiqishi oqibatida neft qazib olish qariyb bir oyga to‘xtatilgan. 11-mart kuni kaustik neytrallash qurilmasida yong‘in sodir bo‘lgan, 26-may kuni esa kon operatori «Tengizshevroil» operatsion nosozlik haqida xabar bergan.

Qozog‘iston neftini Qora dengiz sohilidagi Novorossiysk yaqinidagi terminalga yetkazib beruvchi Kaspiy quvur konsorsiumi infratuzilmasida ham muammolar kuzatilgan. 2026-yilda konsorsiumning Qora dengizdagi obyektlari va neft tashuvchi tankerlarga bir necha bor Ukraina dronlari hujum qilgani xabar qilingan. Hodisalar ortidan neft yuklash vaqtincha to‘xtatilgan va Qozog‘iston qazib olish hajmini kamaytirishga majbur bo‘lgan.