Афғонистонда Эронга кетаётган 5 муҳожир саҳрода ҳалок бўлди, 14 нафари бедарак йўқолди

Афғонистоннинг Нимроз вилоятидаги саҳрода Эронга ноқонуний йўллар орқали ўтишга уринган 19 нафар йигитдан беш нафари ҳалок бўлгани аниқланди. Қолган 14 нафар фуқаро эса ҳозирча бедарак йўқолган. Бу ҳақда Афғонистоннинг TOLOnews нашри ёзди.

Ҳуқуқ-тартибот идоралари маълумотига кўра, ушбу гуруҳ Ҳилманд ва Нимроз вилоятлари орқали Эронга ноқонуний равишда ўтишга ҳаракат қилган.

Улардан беш нафари кучли жазирама ва сувсизланиш оқибатида ҳалок бўлган. Қолган 14 кишининг тақдири эса ҳозирча номаълум.

Қутқарув ва хавфсизлик кучлари бедарак йўқолганларни тирик ёки ўлик ҳолда топиш учун қидирув ишларини давом эттирмоқда.

Ҳукуматдан иш ўринлари яратиш сўралмоқда

Нимрозлик фуқаро Аҳмад Баракзай ҳукуматни янги иш ўринлари яратишга чақирди.

“Эронга виза олиш имконсиз, мамлакатда эса иш йўқ. Шу сабаб ноқонуний миграция авж олди. Саҳрода 20–30 киши бедарак йўқолган, улардан уч ёки тўрт нафарининг жасади аллақачон топилган”, — деди у.

Айрим таҳлилчилар ҳукумат ноқонуний миграцияни камайтириш учун амалий чоралар кўриши зарурлигини таъкидламоқда.

Уларнинг фикрича, бунинг учун мамлакатда янги иш ўринлари яратиш ва хорижда ишлашни истаган афғон фуқаролари учун қонуний миграция йўлларини енгиллаштириш лозим.

Сиёсатшунос Басир Аҳмад Донишёр бу борада қуйидагича фикр билдирди:

“Ҳукумат, аввало, иш ўринлари яратиши керак. Агар бунинг имкони бўлмаса, афғон ишчиларини бошқа давлатларга қонуний ва хавфсиз йўллар билан юбориш механизмини ишлаб чиқиши зарур. Бу яна кўплаб ёшлар ва қимматли инсон ресурслари қурбон бўлишининг олдини олади”, — деди у.

Афғонистоннинг жануби-ғарбида жойлашган Нимроз вилояти Покистон ва Эронга ноқонуний миграция қилишга уринаётган афғонлар фойдаланадиган асосий транзит йўналишларидан биридир.