Европа Иттифоқи миграция масаласида Толибон билан музокара ўтказмоқчи

Европа Комиссияси расман тан олинмаган Толибон маъмуриятини тартибсиз миграцияга қарши курашиш ва депортациялар доирасида Толибон расмийларини музокараларга таклиф қилмоқда. Бу ҳақда Euronews нашри хабар берди.

“Бошпана сўрови рад этилганларни Афғонистонга қайтариш масаласида Толибон ҳукумати билан музокара қилиш керак. Европанинг бошқа чораси йўқ”, – деди Европа Иттифоқининг миграция бўйича комиссари Магнус Бруннер журналистларга.

У пайшанба куни Брюсселда ўтказилиши режаланган ҳамда танқидчиларнинг фикрича, блокнинг қадриятларига зид бўлган эҳтимолий учрашувни ҳимоя қилди.

Толибон расмийларига Белгияга ташриф буюриш учун ҳали виза берилмаган ва учрашув санаси белгиланмаган бўлса-да, аллақачон Брюсселда норозиликларга сабаб бўлди бу ҳолат.

2021 йилда Толибон ҳокимият тепасига қайтиб, Ислом қонунларини қатъий жорий қилгач, Европа давлатлари Кобулдаги элчихоналарини ёпган.

Аёллар уйдан чиққанда деярли бутунлай ёпиниб юриши шарт ва уларга кўплаб жамоат жойларига, жумладан, парклар ва спорт залларига кириш тақиқланган, қизларнинг таълим олиши эса 12 ёшгача.

Ҳуқуқ ҳимоячиларига кўра, миллионлаб одамлар очлик ва иқтисодий қийинчиликларга юз тутаётган ҳамда оғир гуманитар инқироз ичида қолган мамлакатга муҳожирларни қайтариш – қонун ва ахлоқ меъёрларига мувофиқ эмас.

Бу “Толибон”ни тан олиш эмас

Бруннернинг таъкидлашича, музокаралар “Толибон режими”ни тан олишни англатмайди. Улар билан мулоқотни давом эттириш Европа манфаатларига тўла мос келади.

“Бундан ташқари, бошпана сўраганлар ва бошпана изловчиларнинг аҳволини яхшилаш учун ҳам улар билан гаплашиш муҳим”, - деди Бруннер.

Жамоатчилик фикри кескинлашиши қитъада ўта ўнг кучларнинг сайловлардаги ютуқларига туртки бераётгани сабаб, Европа ҳукуматлари миграция борасида қатъийроқ позицияга интилмоқда.

Мигрантлар оқими камайиши билан Брюсселда асосий эътибор репатриация тизимини такомиллаштиришга қаратилди.

1 миллион афғонистонлик ариза берган

Блокнинг маълумотлар агентлигига кўра, Европа Иттифоқи 2013–2024 йиллар оралиғида афғонистонликлардан бошпана сўраб топширилган бир миллионга яқин аризани қабул қилган. Бу давр мобайнида уларнинг ярмига яқини маъқулланган.

Ўтган йили Европа Иттифоқига аъзо 27 давлатдан 20 га яқини мамлакатда қолиш ҳуқуқига эга бўлмаган айрим муҳожирларни, хусусан, жиноий жавобгарликка тортилганларни Афғонистонга қайтаришга қизиқиш билдирган эди.

Бу борада олдинга силжиган Германия 2024 йилдан бери жиноий жавобгарликка тортилган 100 дан ортиқ афғонистонликни депортация қилди.