Араб ва бошқа мусулмон давлатлари Исроилнинг Ал-Ақсо масжидига босқинини қоралади

Саккизта араб мамлакати ва аҳолисининг аксарияти мусулмонлардан иборат давлатлар ўта ўнг гуруҳлар ҳамда минглаб исроиллик кўчманчиларнинг Шарқий Қуддусдаги Ал-Ақсо масжидига бостириб киришини кескин қоралади. Бу ҳақда Al Jazeera нашри хабар берди.

23 июль куни эълон қилинган қўшма баёнотда Миср, Индонезия, Иордания, Покистон, Қатар, Саудия Арабистони, Туркия ва Бирлашган Араб Амирликлари ташқи ишлар вазирлари экстремист исроиллик вазирлар бошчилигидаги кўчманчиларнинг бу ишидан норози эканини маълум қилди.

Дипломатлар Исломнинг учинчи муқаддас масканига бостириб кириш Исроил полицияси ҳимояси остида амалга оширилганини алоҳида таъкидлади.

Вазиятнинг кескинлашуви Қуддусдаги муқаддас жойларнинг «тарихий ва ҳуқуқий статус-квосини ўзгартиришга қаратилган ноқонуний уриниш» дея баҳоланди.

«Исроил босиб олинган Қуддус ёки унинг исломий ва насроний муқаддас жойлари устидан суверенитетга эга эмас», — дейилади баёнотда.

Пайшанба куни 4200 дан ортиқ исроиллик кўчманчи ва ўта ўнгчи гуруҳ аъзолари яҳудийларнинг Тиша Б’Ав байрамини нишонлаш учун Ал-Ақсо масжиди мажмуасига бостириб кириши жорий йилдаги энг йирик босқинлардан бири бўлди.

Исроилнинг ўта ўнгчи миллий хавфсизлик вазири Итамар Бен-Гвир ҳам кучли полиция ҳимояси остида ҳудудга кирди.

Фаластин расмийларининг сўзларига кўра, Исроил кучлари масжид дарвозаларида қатъий чекловлар жорий этиб, кўплаб фаластинлик намозхон ва талабаларнинг киришини чеклаган ҳамда бир неча кишига тажовуз қилган.

Исроил 1967 йили Шарқий Қуддусни эгаллаб, 1980 йили уни расман аннексия қилган. 2024 йили Халқаро суд Исроилнинг Фаластин ҳудудини, жумладан, Шарқий Қуддусни босиб олганини ноқонуний деб топган.