АҚШ Эрон портларига блокада жорий этди

АҚШ ва Эрон ўртасида кескинлик яна кучайди. Вашингтон Эрон портларига қаратилган денгиз блокадасини тиклади. Бу ҳаракатлар эса икки томон ўртасидаги вақтинчалик тинчлик келишуви барбод бўлганини кўрсатмоқда.

АҚШ ҳарбийлари 14 июль куни соат 20:00 дан бошлаб Эрон портлари ва унинг қирғоқ ҳудудларида кираётган ҳамда чиқаётган кемаларга блокада жорий этилганини маълум қилди.

Шунингдек, АҚШ Марказий қўмондонлигининг (CENTCOM) билдиришича, Эронга қарши янги ҳаво ҳужумлари бошланган.

Сўнгги зарбалар Эроннинг Ҳормуз бўғозидаги тижорат кемаларига ҳужум қилиш салоҳиятини пасайтиришга қаратилган.

14 июль куни Эрон ОАВ АҚШ Абадон шаҳри, Маҳшаҳр порти, Қешм ва Киш оролларига зарба берганини маълум қилган.

CENTCOM 13 июль оқшомида ҳам Эрон бўйлаб кенг кўламли ҳужумлар уюштириб, Бушер ва Бандар-Аббос шаҳарларини нишонга олган эди.

Эрон бунга жавобан Ҳормуз бўғозининг Уммон сувларида иккита кемага зарба берди. Ҳужум оқибатида экипаж аъзоларидан бири ҳалок бўлган. Эрон сешанба куни Қувайт, Баҳрайн ва Иорданияга ҳам жавоб зарбалари йўллади.

Можаронинг янги босқичи

Эрон Ислом инқилоби қўриқчилари корпуси сешанба куни иккита супертанкерга зарба берганини тан олди. Уларнинг таъкидлашича, кемалар бир неча бор огоҳлантирилганига қарамай, ҳаракатни давом эттирган ва натижада куч билан тўхтатилган.

Эрон Иорданиядаги Amerika ҳарбий объектларига ҳам зарба берганини даъво қилди. АҚШ ҳарбий-денгиз базаси жойлашган Баҳрайн эса Эроннинг ҳаво ҳужумини қайтарди.

Кескинлик фонида Дональд Трамп аввалроқ эълон қилган Ҳормуз бўғози орқали ўтувчи кемаларга 20 фоизлик йиғим жорий этиш режасидан воз кечганини айтди. Унинг ўрнига Форс кўрфази давлатлари билан савдо ва инвестиция битимлари тузилишини маълум қилди.

«Биринчи бўлиб улар ўқ узди»

Оқ уйда сўзга чиққан Трамп 7 июлдан қайта бошланган ҳарбий кескинлик учун Эронни айблади.

«Биринчи ўқ узган улар. Бу жуда катта хато бўлди, чунки биз уларга қақшатқич зарбалар бермоқдамиз. Улар билан ишлаш жуда қийин», — деди Трамп.

Дональд Трамп ўтган ҳафта 17 июнда имзоланган АҚШ–Эрон меморандуми амалда тугаганини айтиб, АҚШ Эронга қарши ҳарбий амалиётларни қайта бошлаганини Конгрессга расман билдирган эди.

Эрон ташқи ишлар вазири ўринбосари Казем Ғарибободий давлат ОАВга берган интервьюсида АҚШ меморандумни бузиб, ундаги барча мажбуриятларини поймол қилганини таъкидлади.

Эрон эндиликда меморандум бўйича, айниқса Ҳормуз бўғозига оид ҳеч қандай мажбуриятга эга эмас. Унинг сўзларига кўра, АҚШ блокада орқали Теҳронни музокараларга қайтараман деб ўйласа, қаттиқ адашади.