Eron va AQSH bir-biriga zarba berdi

8-iyul kuni AQSh Hormuz bo‘g‘ozidagi tankerlarga hujumi uchun Eronga qarshi harbiy zarbalar berdi. Bunga javoban Eron ham Bahrayn va Quvaytdagi AQSh harbiy obyektlarini nishonga oldi.

Islom inqilobi posbonlari korpusi Bahrayndagi Bandar Salmon, 5-harbiy-dengiz okrugi hamda Quvaytdagi Ali al-Salim aviabazasida joylashgan AQShning asosiy harbiy obyektlariga qarshi qo‘shma raketa va dron operatsiyasini o‘tkazganini hamda operatsiyaga aralashishga uringan AQShning MQ-9 dronini urib tushirganini ma’lum qildi.

Bahrayn va Quvaytda havo hujumidan ogohlantiruvchi sirenalar yangragan. Quvayt armiyasi havo hujumidan mudofaa kuchlari dushman (Eron) raketalari va dronlari hujumiga qarshi kurashayotganini bildirgan.

Avvalroq AQSH bo‘g‘ozdagi uchta tankerga qilingan hujumlarga javoban yangi harbiy zarbalar berib, Eronning neft sotishiga ruxsat beruvchi litsenziyani bekor qilgan edi.

AQSH Markaziy qo‘mondonligi Islom inqilobi posbonlari korpusining 60 dan ortiq kichik qayig‘i nishonga olinganini ochiqladi. Ularning iddao qilishicha, bu harakat sulh bitimini buzgan holda kemalarga zarba bergani uchun Eronni qattiq tovon to‘lashga majburlash maqsadida qilingan.

“Eron kuchlarining asossiz tajovuzi sulh bitimining ochiq va xavfli tarzda buzilishi bo‘lib, kemalar qatnovi erkinligiga putur yetkazadi”, — deyiladi bayonotda.

O‘z navbatida Eron oliy qo‘shma harbiy qo‘mondonligi ham AQSh zarbalarini “yaqqol tajovuzkorlik harakati” deya qoralab, “qaqshatqich javob” bilan tahdid qildi va Tehronning AQShning bo‘g‘ozni boshqarishga aralashuviga yo‘l qo‘ymasligini bildirdi.