G‘azo: Isroilning so‘nggi zarbalari bir oilaning to‘rt a’zosini hayotdan olib ketdi

Isroil harbiylari so‘nggi ikki kun ichida uylarni bombardimon qilishni kuchaytirdi. 10-sentyabr kuni G‘azo sektorining shimolidagi bir uyga berilgan havo zarbasi oqibatida bir erkak, uning rafiqasi hamda 8 va 12 yoshli ikki qizi halok bo‘ldi. Bu haqda Reuters nashri yozdi.

Isroil harbiylari Bayt Lahiya shahridagi ushbu hujum yuzasidan hozircha izoh bermagan.

Isroil va HAMAS bir-birini ayblamoqda

2025-yil oktyabr oyida AQSH vositachiligida erishilgan sulh keng ko‘lamli jangovar harakatlarni to‘xtatgan bo‘lsa-da, Isroil zarbalariga batamom chek qo‘ymadi.

HAMAS va Isroil bir-birini sulh bitimini buzishda ayblamoqda.

O‘t ochishni to‘xtatish kelishuvi kuchga kirganidan beri G‘azoda 1300 dan ortiq falastinlik – asosan tinch aholi vakillari halok bo‘lgan. Shuningdek, Isroil rasmiylarining aytishicha, 4 nafar isroillik askar ham o‘ldirilgan.

Mahalliy aholi va shifokorlarning so‘zlariga ko‘ra, Isroil harbiylari so‘nggi ikki kun ichida anklav bo‘ylab kamida oltita uyga zarba bergan. Bu zarbalar oqibatida yaqin atrofdagi uylar va chodirlardan iborat boshpanalarga ziyon yetgan, ko‘plab oilalar esa uylarini tashlab qochishga majbur bo‘lgan.

Isroil harbiylari 9-sentyabr kuni G‘azo sektoridagi uchta hududga zarba berib, HAMASning uchta qurol-yarog‘ omborini yo‘q qilganini ma’lum qildi.

Harbiylarning xabar berishicha, 8-sentyabr kuni ham HAMAS va “Islomiy jihod”ga tegishli uchta qurol-yarog‘ ombori yo‘q qilingan. Ularda raketalar va miltiqlar saqlanib, raketa uchirish maydonchasi ham bo‘lgan, deyiladi xabarda.

HAMAS boshqaruvidagi G‘azo hukumati matbuot xizmati rahbari Ismoil As-Savobta Isroilning da’volarini rad etib, uning nishonlari “tinch aholi va ularning uylari” bo‘lganini aytdi.