Isroil armiyasi Gʻazo shahridagi Rantisi bolalar shifoxonasiga zarba berdi

Vazirlik maʼlumotiga koʻra, kecha kechqurun isroillik harbiylar bir necha daqiqa ichida uch marotaba shifoxonaning yuqori qavatlarini oʻqqa tutgan.

«Bu jinoyat yana bir bor Isroilning Gʻazodagi sogʻliqni saqlash tizimini qasddan yoʻq qilishga qaratilgan siyosatini isbotlaydi», — deyiladi bayonotda.

Rantisi bolalar shifoxonasi Gʻazo sektorida yagona ixtisoslashtirilgan tibbiy muassasa hisoblanadi. U yerda onkologik kasallar davolanadi, dializ jarayonlari oʻtkaziladi, nafas olish va hazm tizimi kasalliklari bilan ogʻrigan bemorlarga yordam koʻrsatiladi.

Hujum vaqtida shifoxonada 80 bemor davolanayotgan boʻlib, ular orasida reanimatsiya boʻlimidagi 4 nafar bola va yangi tugʻilgan chaqaloqlar boʻlimidagi 8 nafar chaqaloq ham bor edi.

Zarba ortidan 40 nafar bemor farzandlarini asrab qolish va xavfsiz joy izlash maqsadida shifoxonani tark etgan. Qolgan 40 nafar bemor va ularga hamroh shaxslar, jumladan 12 nafar ogʻir ahvoldagi reanimatsiya bemori hamda 30 nafar tibbiyot xodimi binoda qolgan.

Sogʻliqni saqlash vazirligi hujumni keskin qoralab, Gʻazodagi barcha tibbiyot muassasalari, ularning xodimlari va bemorlarni himoya qilishga chaqirdi.

Isroil armiyasi esa hali ham Gʻazo sektoridagi turli hududlarga massirovan hujumlar uyushtirib, aholi uylarini bombardimon qilmoqda. Buning orqali ular tinch aholini oʻz uylarini tark etishga majbur qilishga intilayapti.