Исроил ҳарбийлари яна тинч аҳолига ҳужум қилди

Қайд этилишича, биргина Ғазо шимолидаги Ал-Бақа қаҳвахонасига уюштирилган ҳужум оқибатида 39 киши ҳалок бўлган.

Воқеа гувоҳларидан Яҳё Шарифнинг айтишича, ҳужумни Исроил қирувчи самолётлари амалга оширган.

"Биз одамларнинг парча-парча бўлган жасадларини кўрдик. Бу жойда ҳеч қандай сиёсий ёки ҳарбий ташкилот билан алоқаси бўлмаган, оддий тинч аҳоли тўпланган маскан эди. У ер болалар билан тўла эди", — деди у.

Бомбардимон қаҳвахонани бутунлай вайрон қилиб, ерда катта чуқур ҳосил қилган.

"Аl Jazeera" телеканали мухбири Ҳани Маҳмуднинг хабар беришича, ҳужум ҳеч қандай огоҳлантиришсиз содир бўлган.

"Бу ҳудудда кўплаб урушдан чарчаган, стрессга тушган ва бошпанасиз қолган одамлар иссиқдан паноҳ топиш учун келар эди. Портлаш кучи шунчалик кучли эдики, ҳозир ҳам ҳар тарафда қон излари қолган. Айрим жасадлар ва тана бўлаклари бинонинг сув билан тўлган қаватларидан йиғиб олинди", — дейди у.

Шунингдек, душанба куни Исроил кучлари Ғазо шаҳрининг Зайтун туманида озиқ-овқат тарқатиладиган омборга ҳаво ҳужуми уюштирди. Натижада, егулик олишга келган камида 13 киши ҳалок бўлди.

Эслатиб ўтамиз, 29 июнь куни Исроил армияси Ғазо шимолига қилган ҳужуми оқибатида 74 нафар фаластинлик ҳалок бўлди. "Аl Jazeera" телеканали мухбирининг айтишича, Исроил ҳарбийлари Ғазо шимолига аҳолини бу ерни тарк этиши учун оҳорлантириш сифатида варақалар тарқатган.