Isroil harbiylari yana tinch aholiga hujum qildi

Qayd etilishicha, birgina Gʻazo shimolidagi Al-Baqa qahvaxonasiga uyushtirilgan hujum oqibatida 39 kishi halok boʻlgan.

Voqea guvohlaridan Yahyo Sharifning aytishicha, hujumni Isroil qiruvchi samolyotlari amalga oshirgan.

"Biz odamlarning parcha-parcha boʻlgan jasadlarini koʻrdik. Bu joyda hech qanday siyosiy yoki harbiy tashkilot bilan aloqasi boʻlmagan, oddiy tinch aholi toʻplangan maskan edi. U yer bolalar bilan toʻla edi", — dedi u.

Bombardimon qahvaxonani butunlay vayron qilib, yerda katta chuqur hosil qilgan.

"Al Jazeera" telekanali muxbiri Hani Mahmudning xabar berishicha, hujum hech qanday ogohlantirishsiz sodir boʻlgan.

"Bu hududda koʻplab urushdan charchagan, stressga tushgan va boshpanasiz qolgan odamlar issiqdan panoh topish uchun kelar edi. Portlash kuchi shunchalik kuchli ediki, hozir ham har tarafda qon izlari qolgan. Ayrim jasadlar va tana boʻlaklari binoning suv bilan toʻlgan qavatlaridan yigʻib olindi", — deydi u.

Shuningdek, dushanba kuni Isroil kuchlari Gʻazo shahrining Zaytun tumanida oziq-ovqat tarqatiladigan omborga havo hujumi uyushtirdi. Natijada, yegulik olishga kelgan kamida 13 kishi halok boʻldi.

Eslatib oʻtamiz, 29 iyun kuni Isroil armiyasi Gʻazo shimoliga qilgan hujumi oqibatida 74 nafar falastinlik halok boʻldi. "Al Jazeera" telekanali muxbirining aytishicha, Isroil harbiylari Gʻazo shimoliga aholini bu yerni tark etishi uchun ohorlantirish sifatida varaqalar tarqatgan.