Janubiy Koreya Shimoliy Koreya bo‘yicha pozitsiyasini o‘zgartirdi

Janubiy Koreyaning Prezident Li Chje Myun boshchiligidagi amaldagi hukumat Shimoliy Koreya bilan munosabatlarda “bosim va qarama-qarshilik” siyosatidan voz kechib, pozitsiyasini “tinch-totuv birga yashash”ga qaratdi.

18-may kuni Birlashish vazirligi tomonidan e’lon qilingan “Oq kitob”da shu haqda so‘z boradi.

“Yonhap” axborot agentligining qayd etishicha, avvalgi hukumat yondashuvidan tubdan farq qiluvchi ushbu yillik hujjat o‘tgan yilning iyun oyida hokimiyatga kelgan Li ma’muriyatining taranglashgan koreyalararo munosabatlarni tiklashga qaratilgan sa’y-harakatlarini aks ettiradi.

Prezident Yun Sok Yol boshchiligidagi mamlakatning avvalgi konservativ hukumati Shimoliy Koreyaga bosim o‘tkazish va u yerga tashqi axborot oqimini olib kirish orqali Pxenyanda o‘zgarishlar qilishga intilgandi.

Hujjatda keltirilgan Seulning uchta asosiy yetakchi tamoyili quyidagilar:

-       Shimoliy Koreyadagi davlat tuzumini hurmat qilish;

-       uni o‘ziga qo‘shib olish orqali birlashishga intilmaslik;

-       har qanday dushmanlik harakatlaridan yiroq bo‘lish.

Shuningdek, “Oq kitob”da Li hukumatining Shimoliy Koreyaga davlatga qarshi targ‘ibot varaqalarini yuborishni taqiqlash hamda chegara hududlarida karnaylar orqali eshittirishlar berishni to‘xtatish haqidagi qarorlari mavjud.

Ular harbiy taranglikni yumshatish va o‘zaro ishonchni qayta tiklash yo‘lidagi muhim qadamlar sifatida baholangan.

Bundan tashqari, hujjatda o‘sha paytdagi Prezident Mun Chje In va KXDR yetakchisi Kim Chen In tomonidan 2018-yil 19-sentyabrda imzolangan koreyalararo harbiy bitimni qayta tiklash hamda tinch-totuv birga yashashning tizimli asosini yaratish maqsadida ikki tomonlama yangi kelishuvga erishish rejalari bayon etilgan.

Shunga qaramay, ikki ashaddiy raqib o‘rtasida so‘nggi besh yil ichida hech qanday gumanitar va iqtisodiy almashinuvlar amalga oshirilmagani sababli, koreyalararo munosabatlar amalda “muzlagan” holda qolmoqda.

Boz ustiga, joriy oy boshida Shimoliy Koreya o‘z Konstitutsiyasiga o‘zgartirish kiritib, birlashishga oid barcha bandlarni olib tashladi va Janubiy Koreya bilan amaldagi so‘nggi aloqalarni ham uzdi.