Полшанинг Жешув шаҳрида 27 апрель куни бўлиб ўтган “Road to URC” конференцияси давомида Полша Бош вазири Доналд Туск ва Украина Бош вазири ўринбосари Юлия Свириденко янги йирик лойиҳани эълон қилишди.
Унга кўра, Полша ва Украина биргаликда умумий дронлар флотини (армадаси) барпо этади. Ушбу ҳамкорликда Полшанинг молиявий ресурслари Украинанинг бевосита фронтдаги бой тажрибаси билан бирлаштирилади.
Шунингдек, мазкур лойиҳани қўллаб-қувватлашда Европа Иттифоқининг мудофаа жамғармаси маблағлари ҳам жалб этилиши режалаштирилган.
“Полша дронлар флоти – бу Европа Иттифоқи маблағлари, Полша компаниялари ва илмий-тадқиқот марказлари ҳамда Украинанинг бевосита жанг майдонидаги тажрибасининг уйғунлашувидир”, – деб ёзди Полша Бош вазири Доналд Туск ўзининг Х платформасидаги саҳифасида.
Унинг таъкидлашича, замонавий учувчисиз учиш аппаратлари флоти Полша ва бутун Европа хавфсизлигини таъминлаши керак. Лойиҳа 50 ойдан буён Россия агрессиясига қарши турган Украинанинг ноёб технологик ва ҳарбий тажрибасига асосланади.
Шунингдек, Туск барқарор тинчлик ва мустаҳкам ҳаво мудофаасига эга бўлмасдан туриб, Украинани самарали қайта тиклаб бўлмаслигини алоҳида қайд этди.
“Полша ўзининг замонавий дронлар армадасига эга бўлиши шарт. Бу нафақат Украинага ёрдам бериш учун, балки полшаликларнинг тўла ишонч билан “Биз хавфсизмиз”, деб айта олишлари учун ҳам зарурдир”, – дея қўшимча қилди Доналд Туск.
Украина Бош вазири ўринбосари Юлия Свириденко Полшани мамлакатнинг асосий стратегик ҳамкори деб атади. У Украина мудофаа секторидаги “шиддатли ўсиш” ҳақида маълумот бериб, соҳадаги ишлаб чиқиш сони бир неча баробар ортганини таъкидлади.
“Биз Россия босқинининг илк кунларида ёрдамга муҳтож давлат эдик, ҳозир эса ўзимиз энг замонавий мудофаа ечимларини тақдим эта оладиган даражага етдик”, – деди у.
