Polsha va Ukraina birgalikda “dronlar floti”ni yaratadi

Polshaning Jeshuv shahrida 27-aprel kuni bo‘lib o‘tgan “Road to URC” konferensiyasi davomida Polsha Bosh vaziri Donald Tusk va Ukraina Bosh vaziri o‘rinbosari Yuliya Sviridenko yangi yirik loyihani e’lon qilishdi.

Unga ko‘ra, Polsha va Ukraina birgalikda umumiy dronlar flotini (armadasi) barpo etadi. Ushbu hamkorlikda Polshaning moliyaviy resurslari Ukrainaning bevosita frontdagi boy tajribasi bilan birlashtiriladi.

Shuningdek, mazkur loyihani qo‘llab-quvvatlashda Yevropa Ittifoqining mudofaa jamg‘armasi mablag‘lari ham jalb etilishi rejalashtirilgan.

“Polsha dronlar floti  – bu Yevropa Ittifoqi mablag‘lari, Polsha kompaniyalari va ilmiy-tadqiqot markazlari hamda Ukrainaning bevosita jang maydonidagi tajribasining uyg‘unlashuvidir”, – deb yozdi Polsha Bosh vaziri Donald Tusk o‘zining X platformasidagi sahifasida.

 

Uning ta’kidlashicha, zamonaviy uchuvchisiz uchish apparatlari floti Polsha va butun Yevropa xavfsizligini ta’minlashi kerak. Loyiha 50 oydan buyon Rossiya agressiyasiga qarshi turgan Ukrainaning noyob texnologik va harbiy tajribasiga asoslanadi.

Shuningdek, Tusk barqaror tinchlik va mustahkam havo mudofaasiga ega bo‘lmasdan turib, Ukrainani samarali qayta tiklab bo‘lmasligini alohida qayd etdi.

“Polsha o‘zining zamonaviy dronlar armadasiga ega bo‘lishi shart. Bu nafaqat Ukrainaga yordam berish uchun, balki polshaliklarning to‘la ishonch bilan “Biz xavfsizmiz”, deb ayta olishlari uchun ham zarurdir”, – deya qo‘shimcha qildi Donald Tusk.

Ukraina Bosh vaziri o‘rinbosari Yuliya Sviridenko Polshani mamlakatning asosiy strategik hamkori deb atadi. U Ukraina mudofaa sektoridagi “shiddatli o‘sish” haqida ma’lumot berib, sohadagi ishlab chiqish soni bir necha barobar ortganini ta’kidladi.

 

“Biz Rossiya bosqinining ilk kunlarida yordamga muhtoj davlat edik, hozir esa o‘zimiz eng zamonaviy mudofaa yechimlarini taqdim eta oladigan darajaga yetdik”, – dedi u

Muallif: Isomiddin Jumanazarov